Edhe OSBE-ja mirëpret shtyrjen e zgjedhjeve në veri

Shefi i misionit të Organizatës për Siguri dhe Bashkëpunim në Evropë (OSBE) në Kosovë, Michael Davenport, ka mirëpritur vendimin e presidentes Vjosa Osmani për shtyrje të zgjedhjeve në veri.

Në një postim në Twitter, Davenport ka thënë se kjo mundësi duhet shfrytëzuar për t’i ulur tensionet e krijuara ditëve të fundit në atë pjesë të Kosovës si dhe për t’u përqëndruar në dialog.

“Mirëpres vendimin e presidentes Osmani dhe të liderëve të partive politike për të shtyrë mbajtjen e zgjedhjeve për kryetarë komune dhe ato për asambletë komunale në veri të Kosovës. Të gjithë duhet ta shfrytëzojnë këtë mundësi për t’i ulur tensionet dhe për t’u përqendruar në dialog”, ka shkruar ai.

I welcome the decision of President Osmani and political party leaders to postpone municipal assembly and mayoral elections in northern municipalities. All should use this opportunity to reduce tensions and focus on dialogue @OSCEKosovo

— Michael Davenport (@DavenportOSCE) December 10, 2022

Për shkak të rritjes së tensioneve në veri të Kosovës, presidentja Vjosa Osmani njoftoi se zgjedhjet janë shtyrë për në prill.

Ajo caktoi 23 prillin e vitit 2023, datë të re për mbajtjen e zgjedhjeve të jashtëzakonshme për kryetarë të komunave: Mitrovicë e Veriut, Zubin Potok, Leposaviq dhe Zveçan dhe për kuvendet komunale të Zveçanit dhe Leposaviqit.

Këtë vendim e kanë mirëpritur edhe shtetet e QUINT-it.

Zgjedhjet kanë qenë të planifikuara të mbahen më 18 dhjetor. /Telegrafi/