Drejtori i QKMF-së në Prizren u kërkon falje qytetarëve që pritën gjatë për t’u vaksinuar

Drejtori i Qendrës së Mjekësisë Familjare në Prizren, Xhevat Elezkurtaj, u ka kërkuar falje të gjithë qytetarëve që pa fajin e tyre pritën disa orë për t’u vaksinuar.

Elezkurtaj përmes një postimi në Facebook, ka shkruar se ekipet e vaksinimit nuk kanë mundur të punojnë për shkak të defekteve me rrymë elektrike, transmeton Telegrafi.

“Ekipet tona të vaksinimit sot u detyruan të mos punojnë disa orë për shkak te defekteve të rrymës elektrike në sallën sportive ‘Sezair Surroi’ si pasojë e këputjes se kabllos elektrike nëntokësore gjatë punimeve aty afër objektit. Kërkojmë ndjesë për të gjithë ata njerëz që pa fajin e tyre pritën disa orë për tu vaksinuar. Edhe pse jemi më të mirët me shërbimet tona shëndetësore ne nivel vendi edhe ne jemi Kosovë”, ka shkruar ai.

Ndryshe, KEDS sot kishte njoftuar që në sallën “Rexhai Surroi” në Prizren, ku po bëhet vaksinimi i popullatës, energjia elektrike është ndalur pasi kabllot nëntokësore janë dëmtuar nga një kontraktor i Komunës së Prizrenit. /Telegrafi/