Dodik: Nuk do të marrë pjesë kur Samiti SEECP të mbahet në Kosovë

Kryesuesi i Presidencës së Bosnje dhe Hercegovinës, Milorad Dodik, deklaroi sot se nuk do të vijë në Kosovë, kur të mbahet takimi i radhës së Samitit të Procesit të Bashkëpunimit të Evropës (SEECP).

Ai këto komente i bëri sot pas takimit me presidentin e Turqisë, Recep Tayyip Erdogan në Sarajevë, ku po mbahet samiti SEECP, në të cilën nuk merr pjesë Kosova.

Ai falënderoi presidentin turk që ka mbajtur fjalën dhe po merr pjesë në samit.

“E falënderoj Erdoganin që e mbajti premtimin që ma dha në Ankara, kur e kemi ftuar që të vijë dhe erdhi”, tha Dodik, përcjell Telegrafi.

Lexo po ashtu Shefja e diplomacisë bullgare: Mungesa e Kosovës dhe Shqipërisë në Samitin e SEECP shenjë e keqe

Kur bëhet fjalë për mbajtjen e forumit në Kosovë, e cila është kryesuese e SEECP, Dodik tha se nuk ka nevojë të jetë pjesë e tij.

“Kjo do të jetë presidencë e pasuksesshme e SEECP. Unë prej 20 korrikut nuk do të jem më kryesues dhe le të vendosin, por në formatin në të cilën BeH nuk e njeh statusin e Kosovës. Ka një modalitet për bashkëpunim dhe me siguri dikush do të shkojë në emër të Bosnjës,” tha Dodik.

Ndryshe, presidenti i Kosovës Hashim Thaçi nuk ka marrë pjesë në samitin në Sarajevë, pasi ftesa nga Dodik ishte dërguar me fusnotë.