Dikush duhet ta mbajë peshën e mëkateve …

Nga: Ben Blushi

Këtë burrë me kryq mbi shpinë, e takova përpara ndeshjes Roma-Feynord në Tiranë.

– Ç’bën këtu – e pyeta.

– Të gjithë janë tifozë të futbollit sot – tha.

– Po ti çfarë je?

– Unë jam tifoz i Krishtit.

– Ku po e çon këtë kryq?

– Nuk po e çoj asgjëkundi, po e mbaj mbi shpinë.

– Pra, ti mban mbi shpinë mëkatet tona si Krishti?

– Sigurisht, edhe të tuat.

– Nuk mendon se pesha e mëkateve është e pamundur të mbahet nga një njeri i vetëm?

– Dikush duhet ta bëjë – tha burri.

– Po pse ti? – e pyeta.

– Sepse askush nuk e bën, as ti nuk e bën.

– Unë sigurisht nuk e bëj, mezi mbaj mëkatet e mia – thashë unë.

– Ti nuk beson – tha burri.

– Nga e di ti që nuk besoj ?

– Të kam lexuar librat.

– Mendon se kuptohet shkrimtari nga librat e vet? – e pyeta.

– Shpirti i shkrimtarit mund të njihet nga mënyra si flet për shpirtrat e tjerë.

– Po nëse unë të bëj ty një foto, a mendon se mund ta njoh shpirtin tënd përmes saj?

– Fotoja nuk është pasqyrë e shpirtit, por e çastit – tha burri.

– Meqë u njohëm, do të të bëj një nder – thashë unë.

– Çfarë nderi? – pyeti burri.

– Nuk do ta tregoj as emrin as fytyrën.

– Po pse do të më fshehësh? – pyeti burri.

– Dua të të mbroj – thashë unë.

– Nga kush do më mbrosh?

– Nga gjithë ata që bëjnë mëkate dhe do vijnë tek ty të të kërkojnë t’ua mbash kryqin mbi shpinë – thashë unë.

– Kjo është detyra e Zotit – tha burri – nuk kam nevojë të më mbrosh nga mëkatarët.

– Epo tani ta dhashë fjalën, thashë unë, mbete i panjohur.

– Vetëm në Facebook-un tënd – tha burri.