Deputetja britanike shtyn lindjen e foshnjës, vetëm për të marrë pjesë në votimin e marrëveshjes për Brexit

Një deputete laburiste e cila është shtatzënë ka kërkuar të shtyjë lindjen e fëmijës së saj në mënyrë që ajo të marrë pjesë në votimin e ditës së martë për Brexit.

Sipas mediave britanike, përcjell Telegrafi, bëhet fjalë për Tulip Siddiq – e cila ka shtyrë lindjen e bebes së saj përmes prerjes cezariane për dy ditë, në mënyrë që ajo të mund të votojë kundër marrëveshjes.

Kështu, në vend që të jetë në një sallë operacioni në një spital në veri të Londrës, ajo planifikon të jetë aty, e sjellë nga burri i saj Chris, me një karrocë.

Duke zbuluar vendimin drastik, ajo tha: “Nëse djali im hyn në botë edhe një ditë më vonë se sa mjekët këshilluan, por është në një botë me një shans më të mirë për një marrëdhënie të fortë midis Britanisë dhe Evropës, atëherë kjo ai vlen për të luftuar”.

Ajo shtoi: “Unë po mendoj për të ardhmen e fëmijës tim kur e mora këtë vendim – të ardhmen e tij në botë”.

“(Gjithsesi) nëse është fjala për një emergjencë absolute, unë natyrisht do të jap prioritet për shëndetin e foshnjës”.

Siddiq, 36 vjeçe, kishte një shtatzëni të vështirë me Azaleën, e cila ishte tani dy vjeç.

Ajo fillimisht kishte planifikuar të kishte një prerje cezariane më 4 shkurt, por mjekët këshilluan që ajo të lind sot ose nesër, pas disa komplikimeve të paraqitura.

Por Siddiq kishte pyetur mjekët nëse mund ta vonojë operacionin deri të enjten dhe ata kanë rënë dakord.

Ndryshe, kryeministrja britanike Theresa May, ka paralajmëruar ligjvënësit se dështimi për të mbështetur planin e saj për largim nga Bashkimi Evropian, do të ishte katastrofë për Britaninë, në prag të votimit në Parlament.

Ligjvënësit pritet të votojnë të martën, pas dështimit të votimit në dhjetor për shkak të mungesës së mbështetjes edhe nga vet partia e saj. /Telegrafi/