Deçani feston Ditën e Çlirimit me aktivitete e festival folklorik

Qyteti i Deçanit feston 25 vjetorin e çlirimit nga forcat serbe, ndërkaq për fundjavë janë organizuara aktivitete e festival folklorik.

Kryetari i kësaj komune Bashkim Ramosaj përmes rrjetit social Facebook, ka bërë të ditur agjendën, duke i mirëpritur qytetarët e kësaj komune t’i ndjekin këto aktivitete.

“Dita e Çlirimit të Deçanit. Agjenda e aktiviteteve për nder të 25 vjetorit të Çlirimit të Deçanit, më 15 dhe 16 qershor. Ju mirëpresim”, ka shkruar Ramosaj.

Sipas agjendës të prezantuar nga kryetari i Deçanit Bashkim Ramosaj, këto aktivitete do të fillojnë që nga mëngjesi i të shtunës me ngritjen e Flamurit Kombëtar në qendër të qytetit dhe me mbjelljen e “Pemës së Lirisë”.

Pastaj do të vazhdoj me seancën solemne në ora 11:00 ku do të shpallet qytetar nderi Dr.Mentor Petrela.

Më pas komuna e Deçanit do të vazhdojë me homazhe pranë lapidareve dhe shtatoreve të dëshmorëve në qendër të qytetit e pastaj edhe në kompleksin memorial në Gllogjan dhe do të mbarojë me festivalin gjithëkombëtar të folklorit që quhet “ESHKË E NDEZUR MBI SHKELZEN”.