Dalin dëshmi të reja të vendosjes ushtarake ruse “brenda distancës goditëse të Ukrainës” në përgatitje për “aktivitetin nëntëmujor”

Dëshmi të reja të një mobilizimi të madh ushtarak brenda “distancës goditëse” të Ukrainës përpara një pushtimi të mundshëm janë shfaqur disa orë pasi presidenti amerikan Joe Biden tha se beson se Vladimir Putin i Rusisë do të pushtojë këtë vend.

Sipas mediave të huaja, përcjell Telegrafi, trupave ruse u është thënë se mund të jenë larg shtëpisë deri në “nëntë muaj” pasi u zhvendosën mijëra milje nga lindja e vendit në rajonin kufitar dhe u paralajmëruan të prisnin përfshirje në një konflikt në Ukrainë.

Imazhet satelitore të datës 19 janar tregojnë një grup të vendosur në bazën e Voronezh rreth 200 milje (330 km) nga kufiri me Ukrainën me rreshta artilerie tankesh dhe pajisje mbështetëse të grumbulluara në Yelnya, 77 milje (125 km) nga kufiri i Rusisë me Bjellorusinë.

Ndërkohë imazhet e tjera tregojnë pajisje ushtarake të mbledhura në dy baza, Klintsky dhe Klimovo, që ndodhen vetëm 18 milje (30 km) nga kufiri i Bjellorusisë dhe jo më shumë se 31 milje (50 km) nga kufiri i Rusisë me Ukrainën.

Dhe, në një zhvillim të ri, Vladimir Putin njoftoi sot stërvitje të reja të mëdha detare që do të zhvillohen këtë muaj dhe në vijim në katër dete, duke përfshirë 140 anije luftarake dhe dhjetëra mijëra marinarë.

“’Lojërat e luftës’ do të zhvillohen në Atlantik, Paqësor, Arktik dhe Mesdhe duke përfshirë “më shumë se 140 anije luftarake dhe anije mbështetëse, më shumë se 60 avionë, 1,000 pajisje ushtarake dhe rreth 10,000 ushtarakë”, tha ministria ruse e mbrojtjes.

Rajoni ka qenë në “teh të thikës” që nga fundi i vitit të kaluar, kur Moska zhvendosi deri në 100,000 trupa, si dhe tanke dhe raketa, afër kufirit, por tensionet janë rritur ditët e fundit pas një rritjeje të pajisjeve dhe raketave dhe lëvizjeve të trupave, mes tyre policore ushtarake, nga skaji lindor i vendit.

Rusia dhe Bjellorusia kanë pretenduar se lëvizja e trupave dhe pajisjeve është e lidhur me stërvitjet e përbashkëta ushtarake të organizuara me ngut midis dy vendeve – por vëzhguesit e quajtën shpjegimin si një maskim tymi për përgatitjet për një pushtim të Ukrainës që Perëndimi tani pret të ndodhë së shpejti. /Telegrafi/