COVID-19: Franca dhe Gjermania propozojnë 500 miliardë euro fond për rimëkëmbjen e BE-së

Presidenti francez Emmanuel Macron dhe kancelarja gjermane Angela Merkel prezantuan të hënën një plan të përbashkët për të nxitur rimëkëmbjen e BE-së nga kriza e coronavirusit, pas disa javësh debati mbi atë se si të vendosnin miliarda euro të nevojshme për të përfunduar një recesion të dhimbshëm.

Sipas medieve të huaja, përcjell Telegrafi, në një video-konferencë të përbashkët, Macron dhe Merkel kërkuan krijimin e një fondi të rimëkëmbjes prej 500 miliardë eurosh, i aftë ofrojë grante për vendet dhe rajonet më të goditura nga kriza e coronavirusit.

Drejtuesit e Francës dhe Gjermanisë gjithashtu thanë që ata po propozojnë të autorizojnë Komisionin Evropian të huazojë para në tregjet financiare në emër të Bashkimit Evropian, duke respektuar njëkohësisht traktatet e BE-së.

Macron tha se kjo ishte hera e parë që Franca dhe Gjermania ranë dakord të lejojnë BE-në të rrisë borxhin së bashku, duke e quajtur këtë një “hap përpara”.

Ai këmbënguli që paratë nga fondi i rimëkëmbjes do të viheshin në dispozicion në formën e granteve dhe jo të kredive.

Presidenti francez tha se nisma franko-gjermane ishte fryt i bisedimeve të gjera me vendet e tjera anëtare të BE-së, përfshirë Italinë dhe Holandën.

Evropa sapo ka filluar të dalë nga bllokimet e vendosura për të ngadalësuar përhapjen e coronavirusit, i cili i ka bërë edhe një goditje ekonomive kombëtare. /Telegrafi/