Çmimi i lartë i naftës dhe vajit, inspektorët e tregut shqiptojnë numër të madh të gjobave

Inspektorët e Tregut, Inspektorët e ATK-së dhe Drejtoria për Hetimin e Krimeve Ekonomike të Policisë së Kosovës, kanë inspektuar operatorë ekonomikë në tërë territorin e Republikës së Kosovës.

Në njoftimin e bërë për media thuhet se, Inspektorati i Tregut i MINT në bashkëpunim me Inspektorët e Administratës Tatimore të Kosovës (ATK), kanë inspektuar pikat shitëse me pakicë të naftës dhe derivateve të naftës me qëllim të mbikëqyrjes së zbatimit të Vendimit të Qeverisë së Republikës së Kosovës për përcaktimin e marzhës tregtare.

“Te disa biznese ka pasur mosbarazim sa i përket sasisë së stokut dhe me këtë rast do të shqiptohen gjoba në përputhje me ligjin”, thuhet në njoftim.

Më tej, në njoftim bëhet e ditur se janë inspektuar depo, markete dhe me këtë rast janë sekuestruar sasi e konsiderueshme e vajrave ushqimore për shkak të mungesës së dokumentacionit, është konstatuar mospërputhje e çmimeve, mashtrime me sasisë e produkteve etj.

“Me këtë rast janë shqiptuar një numër i madh i gjobave gjithashtu lëndët do të trajtohen në pajtim me legjislacionin në fuqi. Inspektimet do të vazhdojnë dhe në çdo rast kur konstatohen shkeljet, do të merren masa ndëshkuese”, vijon njoftimi.

Ndryshe, edhe ministrja e Industrisë, Rozeta Hajdari së bashku me Këshilltarin për inspektime, Kushtrim Dakaj, Ud. Kryeinspektoren e Tregut, Lebibe Haliti, ka njoftuar se ka vizituar pikat shitëse të derivateve, ku edhe është njoftuar nga afër për çmimet aktuale në tregun tonë.

Ditëve të fundit në vend ka pasur ngritje të çmimit të vajit, ku në disa markete, çmimi i një litre vaj ka arritur në 3.49 Euro.  /Telegrafi/