LAJMI I FUNDIT:

Çmimet dhe subvencionet në bujqësi – i rritën apo zvogëluan të mbjellat bujqit kosovarë?

Çmimet dhe subvencionet në bujqësi – i rritën apo zvogëluan të mbjellat bujqit kosovarë?

Zinxhiri botëror i ushqimit që vetëm se ishte dobësuar nga pandemia COVID-19, ndryshimet klimatike e kriza energjike, këtë vit është goditur fuqishëm edhe nga lufta në Ukrainë.

Ukraina dhe Rusia njihen si lidere botërore në eksport të elbit, misrit, luleve të verdha për vajra, farave dhe vajit të lulediellit.

Furnizimi me drithëra po vështirësohet çdo here e më shumë. E mungesat e tilla botërore të ushqimeve nënkuptojnë edhe rritje çmimesh. 7 Ditë me Panxhën i ka kushtuar një storie sfidave me të cilat po ballafaqohen bujqit tanë si shkak-pasojë e këtyre krizave botërore.

Në Kosovë, sipas Agjencisë së Statistikave të Kosovës, Indeksi i Përgjithshëm i Çmimeve të Inputeve në Bujqësi, në tre mujorin e parë të 2022, ka pas rritje për 24.6 për qind, krahasuar me periudhën e njëjtë të vitit 2021.

Indeksi i Përgjithshëm i Çmimeve të Prodhimeve Bujqësore, ku bëjnë pjesë prodhimet bimore dhe ato blegtorale, është rritur për 17.72 për qind, gjatë po të njëjtës periudhë.

Bujku kosovar, Xhevat Brahimi, tregon se në tokat e tij në Korroticë të Ulët të Drenasit këtë vit ka mbjellë rreth 7 hektarë më shumë grurë se vitin e kaluar, por nëse vazhdon ngritja e çmimeve ai thotë se ndoshta do t’i duhet të dorëzohet nga kjo punë.