Mbrëmja e Çmimeve Britanike LGBT 2025, e mbajtur në Londër, shënoi një festë të vërtetë për përfaqësimin dhe aleancën në komunitetin LGBTQ+.
Në qendër të vëmendjes ishin Alex Scott dhe partnerja e saj Jess Glynne, me këtë të fundit që pranoi me krenari çmimin “Figura Publike LGBTQ+ e Vitit” në emër të prezantueses së BBC Sport.
Çifti ka mbajtur një lidhje private për muaj të tërë përpara se ta bënin publike, duke e përshkruar atë si diçka “të veçantë”, shkruan DailyMail.
Jade Thirlwall, e njohur për qëndrimet e saj të hapura dhe aktivizmin e vazhdueshëm, u vlerësua si “Aleatja e Famshme e Vitit”.
Në një videomesazh emocional, ajo falënderoi komunitetin LGBTQ+ për mbështetjen e viteve dhe u zotua se do të jetë gjithmonë një zë i hapur, veçanërisht për mbrojtjen e të drejtave të komunitetit trans.
Jade përmendi gjithashtu me humor suksesin e koleksionit të saj të mallrave provokative, duke treguar se qëndron pas mesazheve që përcjell edhe përmes stilit.
Ndër të nderuarit e tjerë ishin edhe Ian H. Watkins nga grupi Steps për kontributin ndaj prindërimit queer, Billy Porter për rolin e tij si figurë inspiruese në skenë dhe ekran, si dhe India Willoughby dhe Ella Morgan, të cilat u vlerësuan për mbështetjen ndaj komunitetit transgjinor.
Ngjarja, e organizuar nga Scott Mills dhe Kemah Bob, u konsiderua një sukses i plotë për reflektimin që i bëri përfaqësimit në media, ndërgjegjësimit publik dhe rëndësisë së aleancës në kohë kur zërat për barazi janë më të rëndësishëm se kurrë. /Telegrafi/
