City me ofertë të parezistueshme për Atleticon, para dhe Agueron për ta transferuar Griezmannin

Manchester City mbetet njëra nga skuadrat më aktive për të transferuar futbollistë cilësorë.

Pep Guardiola pasi ka transferuar futbollistë si Kevin De Bruyne, Leroy Sane e Gabriel Jesus dëshiron ta përforcojë edhe më shumë repartin ofensivë.

Spanjolli po kërkon transferimin e sulmuesit francez të Atletico Madrid, Antoine Griezmann.

Mediat angleze kanë raportuar se City për transferimin e Griezmannit po mendon ta përfshijë edhe sulmuesin argjentinas Sergio Aguero.

Aguero ka qenë më parë pjesë e Atletico Madrid dhe mbetet ndër lojtarët më të dashur për tifozët e kësaj skuadre.

City ka bërë gati një shumë të hollash prej 40 milionë eurove si dhe Sergio Agueron e ka përfshirë në ofertën e bërë te Atletico.

Klubi spanjoll ende nuk ka kthyer një përgjigje definitive duke e shqyrtuar ende këtë ofertë.

Gjithsesi kjo ofertë e Cityt vlen vetëm për afatin kalimtar të verës pasi aktualisht Guardiola nuk dëshiron të bëjë ndryshime në skuadër.

26-vjeçari francez ka një kontratë me Atletico Madridin deri në vitin 2022 ndërsa për të interesohet edhe Barcelona, Real Madrid dhe Paris Saint Germain.

Ndërkohë Aguero iu bashkua Cityt në verën e vitit 2011 nga Atletico Madrid për rreth 38 milionë euro.

Argjentinasi kaloi pesë vite të mrekullueshme në Spanjë, ndërsa rikthimi i tij do t’i sillte gëzim tifozëve të Atleticos. /Telegrafi/