Çfarë tregon ngjyra e urinës për shëndetin tuaj?

Ngjyra e urinës mund të tregojë në disa raste edhe probleme të mundshme shëndetësore tek njeriu, kështu është e rëndësishme të tregoni kujdes si dhe të jini vigjilent.

Por, çka tregojnë nuancat e ndryshme të urinës sipas urologut Jamin Brahmbhatt, shkruan CNN.

E kuqe ose rozë: Ndonjëherë, ngrënia e ushqimeve të tilla si panxhari ose manaferrat mund ta kthejnë urinën tuaj në ngjyrë të kuqe ose rozë. Megjithatë, sipas ekspertit, nëse vëreni se urina juaj mbetet e kuqe ose rozë me kalimin e kohës, mund të nënkuptojë se ka gjak në të. Ky ndryshim është diçka që nuk duhet ta injoroni, dhe është një ide e mirë të flisni me një mjek për ndryshimin pasi mund të jetë një alarm i kuq për kancerin e fshikëzës dhe veshkave ose çrregullim si zmadhimi i prostatës.

Kafe e errët ose nuancë e përafërt me ngjyrën e çajit: Urina që duket kafe e errët ose si çaji mund të jetë një shenjë se nuk po pini mjaftueshëm ujë. Nëse keni pirë shumë lëngje dhe urina juaj është ende e errët, mund të jetë një shenjë e problemeve të mëlçisë ose probleme të tjera shëndetësore.

Blu ose jeshile: Në rast se shihni ngjyrën blu ose jeshile në tualetin tuaj mund të jetë befasuese, por këto nuanca mund të vijnë për shkak të disa ilaçeve ose ngjyrave në ushqime.

E verdha e ‘gjallë’: vitaminat B mund ta mbushin urinën tuaj me një nuancë të verdhë të ‘gjallë’. Ky efekt, megjithëse i padëmshëm, është një kujtesë e mirë se si dieta dhe suplementet mund të ndikojnë në funksionet trupore.

Çfarë do të thotë kthjelltësia e urinës suaj?

Urina e turbullt mund të jetë shenjë e një infeksioni ose një problemi me veshkat tuaja.

Për më tepër, vlen të përmendet se prania e spermës në urinë mund të ndryshojë gjithashtu qartësinë e urinës, duke e bërë atë të duket e turbullt. /Telegrafi/