Çfarë dihet për ‘bisedimet sekrete’ për luftën në Ukrainë – reagimet e gjermanëve dhe nervozizmin e zyrtarëve të Rusisë?

Gjermania ka pranuar se Rusia “ka zbuluar” një takim ushtarak ku oficerët diskutuan për t’i dhënë Ukrainës raketa me rreze të gjatë – dhe jo vetëm.

Audioja e takimit të video-konferencës u postua në mediat sociale nga kreu i kanalit shtetëror rus RT.

Aty, siç raportojnë mediat e huaja, përcjell Telegrafi, oficerët diskutojnë se si raketat mund të godasin urën Kerç, e cila lidh Rusinë me Krimenë e aneksuar ilegalisht.

Lidhur me këtë, politikanët rusë thanë se audioja vërtetonte se “armiku i saj i betuar” po planifikonte sulme.

Dhe kancelari gjerman Olaf Scholz të shtunën e quajti rrjedhjen e dukshme “një çështje shumë serioze dhe kjo është arsyeja pse ajo tani po hetohet me shumë kujdes, shumë intensivisht dhe shumë shpejt”.

Lexo po ashtu Scholz i Gjermanisë deklarohet rreth 'rrjedhjes shumë serioze' të bisedimeve të ushtrisë së tij për luftën në Ukrainë

Por sipas revistës Der Spiegel, videokonferenca nuk u mbajt në një rrjet sekret të brendshëm të ushtrisë, por në platformën WebEx.

Ndryshe, audioja 38-minutëshe u postua nga shefja e RT Margarita Simonyan të premten, e cila tha se ishte provë që Gjermania po planifikonte sulme në Krime.

Në regjistrim mund të dëgjohen diskutime për përdorimin e mundshëm nga forcat ukrainase të raketave Taurus të prodhimit gjerman dhe ndikimin e tyre të mundshëm.

Ndërkohë një zëdhënëse e ministrisë gjermane të mbrojtjes i tha agjencisë së lajmeve AFP se një bisedë sekrete e forcave ajrore ishte përgjuar.

Megjithatë, ajo tha se nuk ishte në gjendje të thoshte me siguri nëse zërat në regjistrim ishin manipuluar para publikimit.

Në anën tjetër, zëdhënësja e Ministrisë së Jashtme ruse Maria Zakharova kërkoi që Gjermania të japë “menjëherë” shpjegime.

“Përpjekjet për të shmangur përgjigjen e pyetjeve do të konsiderohen si pranim i fajit”, citohet të ketë thënë ajo.

E Dmitry Medvedev, nënkryetari i Këshillit të Sigurimit të Rusisë, theksoi në Telegram: “Rivalët tanë shekullorë – gjermanët – janë kthyer përsëri në armiqtë tanë të betuar”.

“Shikoni, me çfarë thellësie dhe me aq hollësi (gjermanët) diskutojnë goditjen e territorit tonë me raketa me rreze të gjatë, zgjedhin objektivat për të goditur dhe diskutojnë se si t’i shkaktojmë dëmin maksimal atdheut tonë dhe popullit tonë”.

Lexo po ashtu Alarmi vjen nga Luksemburgu: Dërgimi i trupave perëndimore në Ukrainë do të na sillte në prag të Luftës së Tretë Botërore

Kujtojmë se Kievi dëshiron që Gjermania t’i sigurojë Ukrainës raketa Taurus, të cilat kanë një rreze veprimi prej rreth 500 km (300 milje).

Scholz deri më tani ka refuzuar, duke u frikësuar se kjo do të çonte në një përshkallëzim të konfliktit.

Por Franca dhe Britania e kanë furnizuar Kievin me raketa Scalp ose Storm Shadow, të cilat të dyja kanë “gjysmën e rrezes”.

Lidhur me këtë, Roderich Kiesewetter, nga konservatorët e opozitës gjermane, paralajmëroi se mund të zbulohen edhe regjistrime të tjera.

“Një numër bisedash të tjera sigurisht që do të jenë përgjuar dhe mund të zbulohen në një datë të mëvonshme për përfitim të Rusisë”, i tha ai transmetuesit ZDF.

Mund të supozohet se “biseda u zbulua qëllimisht nga Rusia në këtë moment në kohë me një qëllim specifik”, domethënë “për të parandaluar dërgimin e Taurus nga Gjermania”, tha ai. /Telegrafi/