Centrali bërthamor i Zaporizhzhia në Ukrainë humbet sërish lidhjen kryesore me rrjetin elektrik

Centrali më i madh bërthamor i Ukrainës humbi sërish lidhjen e tij kryesore me rrjetin elektrik të shtunën mes bombardimeve të vazhdueshme, pavarësisht pranisë së inspektorëve ndërkombëtarë.

Sipas mediave të huaja, përcjelli Telegrafi, termocentrali bërthamor i Zaporizhzhia tani po mbështetet në një linjë rezervë për furnizimin me energji elektrike në rrjet, tha Agjencia Ndërkombëtare e Energjisë Atomike (IAEA).

Inspektorët nga mbikëqyrësi bërthamor i OKB-së mbërritën në vend të enjten pavarësisht shqetësimeve rreth bombardimeve të vazhdueshme në zonë.

Ukraina dhe Rusia kanë fajësuar njëra-tjetrën për të shtënat e përsëritura të artilerisë.

Ekspertët e IAEA në objektin, i cili aktualisht mbahet nga forcat ruse, por operohet nga një forcë punëtore ukrainase, u informuan nga stafi i lartë ukrainas të shtunën se linja e katërt operacionale e energjisë 750 kv e uzinës ishte në ndërprerje. Tre të tjerë janë ndërprerë më parë.

Megjithatë, një linjë rezervë e lidh objektin me një termocentral aty pranë, i cili dërgon energji elektrike në rrjetin e jashtëm.

Ai gjithashtu mund të sigurojë energji rezervë për centralin nëse kërkohet. Termocentrali ishte shkëputur përkohësisht nga linja kryesore e energjisë elektrike më 25 gusht.

Më vete, menaxhimi i centralit informoi gjithashtu ekipin e IAEA se reaktori numër pesë i uzinës u shkyç të shtunën pasdite për shkak të kufizimeve të rrjetit.

Reaktori i pestë u shkyç gjithashtu të enjten kur drejtori i përgjithshëm i IAEA, Rafael Grossi, vizitoi vendin. Kjo ishte për shkak të një dështimi të brendshëm elektrik dhe u rilidh të premten.

Centrali ka gjashtë reaktorë, vetëm dy prej të cilëve kanë funksionuar.

Ekziston ende një reaktor në funksion i cili prodhon energji elektrike për ftohje, funksione të tjera thelbësore të sigurisë dhe për familjet, fabrikat dhe të tjerët në rrjet, sipas deklaratës së IAEA.

Drejtori i Përgjithshëm Grossi e quajti praninë e ekipit të tij në objekt “një ndryshim të lojës” në një deklaratë të shtunën.

Grossi tha të premten se mbikëqyrësi bërthamor planifikoi të hartonte një raport “në fillim të javës së ardhshme” për të adresuar statusin e objektit. /Telegrafi/