Çabej dhe Poradeci, dy të rinj elegantë në parkun e Grazit

Me pallto, kapele në kokë dhe bastun në dorë, Eqrem Çabej dhe Lasgush Poradeci shëtisin në një park në Graz. Kjo foto është bërë publike nga vajza e Lasgushit, Maria.

Është e njohur miqësia e dy kolosëve të letrave shqipe. Ata ishin dy studentë në Graz, ndërsa janë me dhjetëra letra që kanë shkëmbyer duke debatuar për poezinë apo Shqipërinë.

Maria tregon një episod teksa ata ndodheshin në një lokal të Grazit:

“Ishin të dy me Eqrem Çabeun në Graz (Austri), ishim të dy studentë (vitet 1925-1926). Kishim gjetur për të ngrënë darkë një restorant të vogël, por shumë të mirë familjar. Në guzhinë ishte gruaja, në banak ishte burri dhe vajza e tyre ishte kamarjere. Na pëlqente shumë ushqimi aty. Një natë, po hanim si zakonisht dhe po bisedonim. Lokali ishte plot dhe të gjithë hanin dhe flisnin me njeri-tjetrin dhe nuk ndiheshin. Ne na kishte tërhequr aq shumë biseda sa nuk e kishim vënë re që po flisnim me zë të lartë. Po flisnim shqip. Dhe here pas here aprovonim njeri-tjetrin duke thënë po, po (ata që dinë gjermanisht do ta kuptojnë). E vumë re që klientët na shikonin si të habitur. Po ne vazhdonim të flisnim me zë të lartë. I zoti i lokalit (burri, që rrinte në banak), na u afrua dhe me zë të ulët dhe me shumë sjellje na tha që duhet ta ulnim zërin sepse po shqetësonim të tjerët që ishin duke ngrënë. Ne, nuk e konsideruam vërejtjen e tij dhe vazhduam duke folur me zë të lartë. Ata, klientët, dalëngadalë filluan të paguajë dhe e boshatisën lokalin duke na lënë vetëm. U turpëruam shumë dhe nuk shkelëm më kurrë në atë lokal”, tregonte Lasgushi. /Telegrafi/