Themeluesi dhe miliarderi i Patagonia, Yvon Chouinard, ia ka dhënë kompaninë e tij një grupi organizatash jofitimprurëse që do të sigurojnë që fitimet e kompanisë të përdoren për të “luftuar ndryshimet klimatike dhe mbrojtjen e tokës së pazhvilluar anembanë globit”, raportoi të mërkurën The New York Times.

Sipas mediave të huaja, përcjell Telegrafi, vendimi ka të bëjë veçanërisht me “dashurinë e tij të përjetshme për mjedisin”.

Patagonia do të vazhdojë të operojë si një korporatë private, fitimprurëse, por ajo nuk do të jetë më në pronësi të themeluesit të saj fillestar.

“Shpresojmë se kjo do të ndikojë në një formë të re të kapitalizmit që nuk përfundon me disa njerëz të pasur dhe një grup njerëzish të varfër”, citohet të ketë thënë 83-vjeçari Chouinard për NYT.

Reklama
Reklama

“Ne do të japim shumën maksimale të parave për njerëzit që janë duke punuar në mënyrë aktive për të shpëtuar këtë planet”.

“Nuk dija çfarë të bëja me kompaninë sepse nuk doja kurrë një kompani”, ka thënë Chouinard për vendimin e tij. “Unë nuk doja të bëhesha biznesmen. Tani mund të vdes nesër dhe kompania do të vazhdojë të bëjë gjënë e duhur për 50 vitet e ardhshme, dhe unë nuk kam pse të jem pranë”. /Telegrafi/