Borrell dënon sulmin izraelit në një shkollë në Gazë që la të vdekur më shumë se 100 palestinezë

Përfaqësuesi i Lartë i BE-së për Punët e Jashtme dhe Politikën e Sigurisë, Josep Borrell, ka dënuar sulmin izraelit në një shkollë në Gazë që vrau më shumë se 100 palestinezë, duke thënë se “një armëpushim është mënyra e vetme për të ndaluar vrasjen e civilëve”.

Siç raportohet, diplomati i lartë i BE-së është tmerruar nga imazhet e shkollës së goditur në Gazë nga sulmi izraelit.

Borrell deklaroi se “nuk ka asnjë justifikim për këto masakra” dhe se “një armëpushim  është mënyra e vetme për të ndaluar vrasjen e civilëve”.

Ndër tjera, diplomati evropian tha se BE-ja e mbështet plotësisht thirrjen e liderëve nga SHBA-ja, Egjipti dhe Katari për të përfunduar bisedimet e armëpushimit si dhe për një marrëveshje për lirimin e pengjeve, shkruan euronews, përcjell Telegrafi.

Ai gjithashtu vuri në dukje se mbi 40,000 palestinezë janë vrarë që nga fillimi i konfliktit dhe kritikoi ministrin izraelit, Bezalel Smotrich, për kundërshtimin e një armëpushimi.

Horrified by images from a sheltering school in Gaza hit by an Israeli strike, w/ reportedly dozens of Palestinian victims.

At least 10 schools were targeted in the last weeks. There’s no justification for these massacres

We are dismayed by the terrible overall death toll. 1/2

— Josep Borrell Fontelles (@JosepBorrellF) August 10, 2024

Lexo po ashtu Shkon në 90 numri i palestinezëve të vrarë pas sulmit izraelit në një shkollë në Gaza

Ndryshe, komentet e Borrellit erdhën pasi një sulm ajror izraelit goditi një strehë të kthyer në shkollë në qendër të Gazës, duke vrarë të paktën 100 dhe duke plagosur dhjetëra të tjerë, sipas autoriteteve palestineze.

Në mesin e viktimave raportohet se ka gra, fëmijë dhe të moshuar.

Izraeli e pranoi sulmin në shkollën Tabeen në qendër të Gazës, duke pretenduar se një qendër komanduese e Hamasit ishte vendosur brenda saj.

Por, Izzat al-Rishq, zyrtari i lartë i Hamasit, mohoi të kishte pasur militantë në ndërtesë.

Objekti, si pothuajse të gjitha shkollat ​​e Gazës, është përdorur si strehë për njerëzit që janë detyruar të largohen nga shtëpitë e tyre shkaku i luftës. /Telegrafi/