Boris Johnson ua “ndërron planet” pronarëve të pabeve, për shkak të COVID-19 do të mund të punojmë vetëm në një rast

Pas vënies së masave të reja mbrojtëse për luftimin e përhapjes së mëtejme të coronavirusit në Britani të Madhe, të hapur mund të qëndrojnë vetëm pabet dhe baret që punojnë sikurse restorantet, që do të thotë që shërbejnë ushqim të “vërtetë” gjatë drekës dhe darkës, shkruan Reuters.

“Ata mund të shërbejnë edhe pije, por vetëm kur servohet dreka dhe darka – pra së bashku me ushqim”, thuhet në kumtesë, transmeton Telegrafi.

Në anën tjetër, kryeministri britanik Boris Johnson, më herët kishte paralajmëruar një sërë masash të reja mbrojtëse kundër COVID-19, dhe që do të aplikohen varësisht nga rreziku në rajone të caktuara.

Masat e reja po aplikohen për të zvogëluar rritjen e rasteve të reja në pjesë të caktuara të Anglisë. E sistemi i ri bazohet në tre nivele, që secili është i standardizuar sipas rregullave.

Niveli i parë do të aplikohet në pjesën më të madhe të Anglisë, dhe paraqet zgjatjen e masave ekzistuese mbrojtëse në këtë vend.

Masat kyçe në këtë nivel nënkuptojnë ndalimin e tubimeve apo më shumë se gjashtë personave që jetojnë të një njëjtën lagje, dhe shkurtimi i orarit të punës të objekteve afariste që ofrojnë shërbime “argëtimi”. Atyre do t’ju ndalohet të punojnë nga ora 22:00 deri në 5 të mëngjesit.

Niveli i dytë sipas përshkrimeve nënkupton pjesë më të vogla në Angli, ku tashmë janë në fuqi masat mbrojtëse siç është karantinimi. Aty gjithashtu ndalohen tubimet e më shumë se gjashtë personave në ambiente të hapura.

E në pjesët e Anglisë ku situata epidemiologjike është më kritike do të nënkuptohen me nivelin e tretë. Atje do të ndalohen tubimet në ambiente të hapura por edhe në oborre të shtëpive private, derisa pabet dhe kafiteritë do të qëndrojnë të mbyllura.

Në këto pjesë ekziston mundësia edhe vënia e masave shtesë nga ana e autoriteteve lokale. Kjo do të nënkuptonte mbylljen e palestrave dhe kazinove, derisa shkollat, universitetet dhe marketet nuk do të mbyllen.

Ky sistem i ri do të aplikohet në Angli, derisa Skocia, Uelsi dhe Irlanda e Veriore në mënyrë të pavarur do të vendosin për mënyrën e luftimit të pandemisë së coronavirusit, edhe pse janë pajtuar se do të bashkëpunojnë sa herë që është e nevojshme. /Telegrafi/