BMW prezanton veturat e ardhshme elektrike me konceptin Vision Neue Klasse

Në Motor Show në Mynih, BMW prezantoi konceptin e ri që përfaqëson një vështrim në të ardhmen e veturave elektrike.

BWM vazhdon të hulumtojë dhe zgjerojë gamën e veturave elektrike, dhe dizajni më i fundit koncept është mishëruar në një model të quajtur Vision Neue Klasse.

Modeli vazhdon përmes konceptit të quajtur Vision Circular, i cili u prezantua në vitin 2021, si dhe konceptit të këtij viti Vision Dee. Përveç detajeve estetike që ia vlen të diskutohen, BMW thekson se Vision Neue Klasse do të ketë një rreze veprimi dhe shpejtësi karikimi 30 për qind, si dhe do të jetë 25 për qind më efikas.

Kompania dëshiron që vetura e re elektrike të bëjë hapa të rëndësishëm përpara në krahasim me paraardhësit e saj.

“Me konceptin Neue Klasse, ne filluam investimin më të madh në historinë e kompanisë. Ne nuk po shkruajmë vetëm kapitullin tjetër të BMW-së, por po shkruajmë gjithashtu një libër krejtësisht të ri”, tha Frank Weber, anëtar i Bordit të Menaxhmentit të BMW AG.

Kompania thotë se dizajni i ri është aq progresiv sa që edhe në pamje të parë duket se kompania e ka “kapërcyer” modelin.

Një nga tiparet më interesante të konceptit BMW Vision Neue Klasse janë ulëset e verdha të stilit të sallonit. Ndonëse duken argëtuese, vështirë se do të shfaqen në ndonjë model që do të tregtohet.

Megjithatë, heqja e kromit dhe lëkurës teorikisht do ta bënte të gjithë prodhimin më miqësor me mjedisin. Brendësia është e pajisur me sistemin e gjeneratës së re iDrive dhe prodhuesi gjerman shfrytëzoi rastin të prezantojë BMW Panoramic Vision, i cili ofron informacione të tilla si navigimi, shpejtësia dhe të ngjashme përgjatë pjesës së poshtme të xhamit të përparmë.

BMW dëshiron të sigurohet që koncepti të tërheqë të gjithë dhe thotë se ngjyra e saj tregon “karakterin miqësor dhe të përqendruar në të ardhmen e makinës”. Ngjyra e trupit quhet “Joyus ndritshme”.

Versioni i prodhimit të konceptit pritet në treg në vitin 2025. /Telegrafi/