BE: Bisedimet produktive, u dakordua për intensifikim të punëve

Shërbimi diplomatik evropian njoftoi se Federica Mogerini u takua me Aleksandar Vuçiq dhe Hashim Thaçin në kuadër të dialogut të ndërmjetësuar nga BE.

“Përfaqësuesja e Lartë dhe presidentët kishin bisedime intensive dhe produktive në kuadër të marrëveshjes për normalizimin gjithëpërfshirës të marrëdhënieve të dyja palëve. Ata ranë dakord të intensifikojnë punën në javët e ardhshme”, thuhet në deklaratën për media të Shërbimit Evropian për Punë të Jashtme.

Një takim i nivelit të lartë midis delegacioneve të Beogradit dhe Prishtinës përfundoi në Bruksel sonte pas tre orësh bisedimesh të drejtpërdrejta.

Ndërkohë pas takimit janë deklaruar edhe presidenti i Kosovës, Hashim Thaçi, si dhe ai i Serbisë, Aleksandar Vuçiq.

Presidenti i Republikës së Kosovës, Hashim Thaçi, pas takimit me presidentin e Serbisë, Aleksandar Vuçiq ka thënë se ka qenë një takim jo i lehtë, ka qenë një takim i vështirë por me tone pozitive për të shikuar nga e ardhmja për interesin e dy vendeve.

Siç ka thënë presidenti Thaçi, përcjell Telegrafi, gjatë takimit është rënë dakord që procesi të merr një dinamikë dhe të intensifikohet në javët e ardhshme.

Ndërkaq presidenti i Serbisë, Aleksandar Vuçiq, ka thënë se një zgjidhje mes Serbisë dhe Kosovës duhet të jetë racionale, dhe se të gjitha problemet duhet të zgjidhen në mënyrë paqësore.

Vuçiq tha se janë arritur disa gjëra dhe ato janë shumë të rëndësishme për serbët në Kosovë.

Ai ka thënë se në periudhën e ardhshme do t’i drejtohet popullit serb rreth zgjidhjes së “problemit të Kosovës”, por nuk saktësoi se kur do të bëjë një gjë të tillë. /Telegrafi/