Teknologji Lajme Teknologji

Bill Gates ka publikuar një letër për Inteligjencën Artificiale – parashikimet e tij fokusohen në tre sektorët që AI mund të transformojë

Para 2 vitesh

Bill Gates, bashkëthemeluesi i Microsoft publikoi një letër me shtatë faqe të martën – “Epoka e AI ka filluar” – duke përshkruar pikëpamjet e tij për të ardhmen e Inteligjencës Artificiale.

Në letër, ai shkroi se zhvillimi i AI është “po aq thelbësor sa krijimi i mikroprocesorit, kompjuterit personal, internetit dhe telefonit celular”, përcjell Telegrafi.

Gates ka folur më parë për entuziazmin e tij për të ardhmen e AI, përkatësisht se si mund të përdoret si mësues në arsim ose për të ofruar këshilla mjekësore për njerëzit ku mjekët nuk janë lehtësisht të arritshëm.

Miliarderi gjithashtu përmendi në letër shqetësimet rreth Inteligjencës Artificiale, duke përfshirë rrezikun që njerëzit ta keqpërdorin atë.

Ndërsa në letër, Gates shtjelloi këto ide duke diskutuar mendimet e tij se si AI mund të përdoret si një mjet për të përmirësuar produktivitetin e njerëzve dhe se si mund të ndihmojë në përmirësimin e pabarazive globale – në vendin e punës, kujdesin shëndetësor dhe arsimin.

Fillimisht Gates shkruan se si AI mund të përdoret në fuqinë punëtore si një “asistent personal dixhital” për të rritur produktivitetin e punonjësve – një ide për të cilën foli më parë në shkurt.

AI, e integruar në mjetet dixhitale të punës si Microsoft Office, mund të ndihmojë në menaxhimin dhe shkrimin e emaileve, shkroi Gates, përcjell Telegrafi.

Ai thekson se këta “agjentë personalë” të gjeneruar nga AI – të pajisur me njohuri dhe të dhëna të gjera për kompaninë dhe industrinë e tyre – mund të paraqesin gjithashtu “burime” për punonjësit për të komunikuar.

“Ndërsa fuqia kompjuterike bëhet më e lirë, aftësia e GPT për të shprehur idetë do të jetë gjithnjë e më shumë si të kesh një punonjës me jakë të bardhë në dispozicion për t’ju ndihmuar me detyra të ndryshme”, shkruan ai.

Sa i përket industrisë së kujdesit shëndetësor, Gates vlerëson se AI mund të çlironte punonjësit e kujdesit shëndetësor nga detyra të caktuara, duke përfshirë paraqitjen e kërkesave të sigurimit, plotësimin e dokumenteve dhe hartimin e shënimeve të vizitës së mjekut.

Gates mendon se për vendet e varfra, ku “shumë njerëz në ato vende nuk mund të vizitojnë kurrë një mjek”, AI mund t’u mundësojë punonjësve të kujdesit shëndetësor të jenë më produktivë me pacientët që kontrollojnë.

Është e mundur që AI mund të ndihmojë gjithashtu në trajtimin e pacientëve që nuk jetojnë pranë objekteve shëndetësore, shkroi Gates.

AI tashmë përdoret në kujdesin shëndetësor për të analizuar të dhënat mjekësore, sipas Gates, por vala tjetër e mjeteve të AI mund të ndihmojë në parashikimin e efekteve anësore të ilaçeve dhe llogaritjen e niveleve të dozës.

Për të korrat dhe bagëtinë në vendet e varfra, Gates konsideron se AI mund të ndihmojë në hartimin e farave të përshtatura për klimat lokale dhe zhvillimin e vaksinave për bagëtinë – zhvillime që mund të jenë të rëndësishme “pasi moti ekstrem dhe ndryshimet klimatike bëjnë edhe më shumë presion mbi fermerët që jetojnë në vendet me të ardhura të ulëta”.

Gates parashikoi gjithashtu se AI mund të transformojë arsimin në pesë deri në 10 vitet e ardhshme duke ofruar përmbajtje të përshtatur me stilin e të mësuarit të një studenti dhe duke mësuar se çfarë i motivon studentët individualë dhe i bën ata të humbasin interesin për lëndët, përcjell Telegrafi.

Sipas tij, AI mund të ndihmojë gjithashtu mësuesit duke ndihmuar në planifikimin e mësimit dhe duke vlerësuar të kuptuarit e studentëve për temat e klasës.

“Edhe pasi teknologjia të jetë përsosur, mësimi do të varet ende nga marrëdhëniet e shkëlqyera midis studentëve dhe mësuesve”, thuhet në letër. “Ai do të përmirësojë – por kurrë nuk do të zëvendësojë – punën që studentët dhe mësuesit bëjnë së bashku në klasë”.

Në letrën e tij Gates përmend faktin se AI do të duhej gjithashtu të bëhej njësoj e qasshme për shkollat me të ardhura të ulëta në mbarë globin “në mënyrë që studentët në familjet me të ardhura të ulëta të mos mbeten prapa”.

Veç kësaj, mësuesit gjithashtu do të duhet të përshtaten me studentët që përdorin teknologji të reja në klasë, si GPT.

“Për të përfituar sa më shumë nga kjo teknologji e re e jashtëzakonshme, ne do të duhet të ruhemi nga rreziqet dhe të shpërndajmë përfitimet tek sa më shumë njerëz të jetë e mundur”, ka thënë si konkluzion Gates. /Telegrafi/