Bien aksionet e kompanisë kineze Alibaba

Aksionet e kompanisë kineze Alibaba ranë në vlerën e më shumë se 4 për qind, pasi ish-shefi ekzekutiv i grupit Daniel Zhang u largua nga njësia e saj Cloud, duke i shqetësuar investitorët dhe rritur shqetësimet se si mund të ndikojë në planet e kësaj njësie.

Vetëm dy muaj që kur Zhang zgjodhi të heqë dorë nga pozitat e tjera për t’u fokusuar në Cloud, shefi ekzekutiv i grupit Eddie Wu po përballet me rritjen e dobët të shitjeve.

Cloud Intelligence Group është burimi i dytë më i madh i të ardhurave të Alibabas pas shitjeve online dhe strehon modelin gjenerues të inteligjencës artificiale të grupit Tongyi Qianwen dhe aplikacionin e mesazheve Dingtalk.

Të ardhurat e njësisë ranë me 2 për qind për herë të parë në periudhën janar-mars, për shkak të projekteve të vonuara dhe faktorëve të tjerë.

Lexo po ashtu Bien aksionet e Apple shkaku i vendimit të qeverisë kineze

Me një vlerë prej 41 miliardë dollarë deri në 60 miliardë dollarë, njësia po shkon drejt një IPO të parakohshme. Sidoqoftë, grupi mund t’i vendosë ato në pikëpyetje pasi siguria e të dhënave dhe shqetësimet gjeopolitike po rriten.

Kompania tha se do të vazhdojë planin e saj për të shkëputur njësinë Cloud nën një ekip menaxhues ende të pacaktuar. Në fillim të këtij viti, kompania tha se do të përfundonte procesin deri në maj 2024.

Zhang, i cili pasoi bashkëthemeluesin Jack Ma si shef i grupit më 2015 dhe kryetar më 2019, mori përgjegjësinë e njësisë Cloud në dhjetor pas një ndërprerjeje që e përshkroi si “dështimi më i gjatë në shkallë të madhe” në më shumë se një dekadë. /Telegrafi/