Bie edhe Ghazni, talebanët marrin edhe kryeqytetin e 10-të krahinor në Afganistan në më pak se një javë

Talebanët kanë marrë qytetin e rëndësishëm strategjik Ghazni, kryeqytetin e 10 -të krahinor që ra në duart e militantëve në më pak se një javë.

Sipas mediave të huaja, përcjell Telegrafi, Ghazni është në autostradën kryesore Kabul-Kandahar, që lidh fortesat e militantëve në jug me kryeqytetin, Kabul.

Marrja e Ghazniut mendohet të rrisë gjasat që talebanët përfundimisht të synojnë të marrin vetë Kabulin.

Pothuajse një e treta e 34 kryeqyteteve krahinore të vendit tani janë nën kontrollin e talebanëve.

Kryengritësit kanë lëvizur me shpejtësi, duke pushtuar territore të reja pothuajse çdo ditë, ndërsa trupat amerikane dhe të tjera të huaja tërhiqen pas 20 vitesh operacionesh ushtarake.

Në Ghazni, një anëtar i këshillit krahinor i tha BBC se talebanët kishin marrë pjesën më të madhe të qytetit, me vetëm një bazë policie në periferi të kontrolluar nga forcat afgane të sigurisë.

Luftime të rënda u raportuan gjithashtu në qytetin e Kandahar të mërkurën ndërkohë që talebanët pretendojnë se kanë marrë nën kontroll burgun e qytetit, edhe pse kjo nuk është konfirmuar.

Ndërkohë, ambasada amerikane në Kabul tha se po dëgjonte raportet se talebanët po ekzekutonin trupat afgane që po dorëzoheshin, duke thënë se ishte "thellësisht shqetësuese dhe mund të përbënte krime lufte". /Telegrafi/