Biden siguron Zelenskyn se 60 miliardë dollarë ndihmë ushtarake do t’i dërgohen Ukrainës

Presidenti i SHBA-së, Joe Biden e ka siguruar homologun e tij Volodymyr Zelensky se 60 miliardë dollarë ndihmë ushtarake do t’i dërgohen Ukrainës.

Sipas mediave të huaja, përcjell Telegrafi, masa ende duhet të kalojë një votim përfundimtar në Kongres, por Biden i tha Zelenskyt se ai kishte besim se do të miratohej.

Zelensky kishte bërë më parë një apel urgjent për më shumë armë për të shmangur një situatë “katastrofike” në Evropë.

SHBA-ja ka fajësuar mungesën e mbështetjes nga Kongresi për tërheqjen e Ukrainës nga beteja në Avdiivka.

Lexo po ashtu Beteja për Avdiivkën po i kushton shtrenjtë Kremlinit, morgje dhe shkolla të braktisura me plot kufoma të ushtarëve të vrarë rusë

Marrja e Avdiivka – një portë për në kryeqytetin rajonal Donetsk të pushtuar nga Rusia në lindje – është fitorja e parë e dukshme e Rusisë që kur ata morën Bakhmutin në maj.

“Ushtria e Ukrainës u detyrua të tërhiqej nga Avdiivka pasi ushtarëve ukrainas iu desh të raciononin municionet për shkak të pakësimit të furnizimeve si rezultat i mosveprimit të Kongresit”, thuhet në një deklaratë të Shtëpisë së Bardhë.

Në fillim të kësaj jave, Senati i SHBA-së miratoi një paketë ndihme prej 95 miliardë dollarësh – e cila përfshin 60 miliardë dollarë për Ukrainën – pas disa muajsh grindje politike.

Por ajo ende përballet me një betejë të vështirë në Dhomën e Përfaqësuesve, ku anëtarët e Partisë Republikane janë të ndarë për masën. /Telegrafi/