Biden për demonstratat pro-palestineze në SHBA: Nuk do t’i ndryshojnë politikat e SHBA-së në Lindjen e Mesme

Presidenti amerikan, Joe Biden, ka folur për herë të parë pas dhunës dhe arrestimeve gjatë demonstratave pro-palestineze në universitetet e SHBA-së.

“Kanë të drejtë për të protestuar, por jo për të shkaktuar kaos”, tha Biden.

Bëhet e ditur se tensionet në universitetet amerikane janë ngritur prej ditësh, pasi demonstruesit kanë refuzuar të largojnë kampet ndërsa administratorët kanë bërë thirrje për shpërndarjen e masës.

Siç raportohet, ka pasur përleshje të shumta midis aktivistëve pro-palestinezë dhe policisë, shkruan skynews, përcjell Telegrafi.

Biden tha se ngjarjet në universitete “vënë në sprovë dy parime themelore amerikane, fjalën e lirë dhe sundimin e ligjit”.

“Të dyja duhet të respektohen”, vazhdoi presidenti.

“Ne nuk jemi komb autoritar ku heshtim njerëzit dhe shtypim disidencën. Por nuk jemi as vend pa ligj. Jemi shoqëri civile, rendi duhet të mbizotërojë”.

Biden shtoi: “Mendimi është thelbësor për demokracinë, por mospajtimi kurrë nuk duhet të çojë në mohim të të drejtave të të tjerëve”.

Gjithashtu, presidenti amerikan theksoi se këto protesta nuk do e shtyjnë të rimendojë ose ndryshojë politikat e SHBA-së në Lindjen e Mesme.

Ndryshe, policia ka arrestuar një numër të madh të protestuesve pro-palestinezë në kampuse, duke përfshirë ato në Universitetin e Kalifornisë dhe Los Anxhelos ku oficerët u detyruan të qëllojnë protestuesit edhe me plumba gome.

Arrestime të tjera janë bërë në Universitetin e Teksasit, Yale, Dartmouth dhe kampuset në New York, Buffalo dhe Stony Brook. /Telegrafi/