Bashkimi Evropian për çdo ditë punon dhe realizon kontakte me partitë politike të Maqedonisë përmes Delegacionit të tij në Shkup, si dhe përmes selisë së Komisionit Evropian në Bruksel, me qëllim të zgjidhjes së gjendjes në Republikën e Maqedonisë, e cila e ka arritur pikën e vlimit pas vendimit të presidentit Gjorgje Ivanov për ti falur të gjithë personat e përfshirë në skandalin e përgjimeve, transmeton Telegrafi Maqedoni.

Siç lajmëron korrespondenti i MIA nga Brukseli, këtë në konferencën e sotme për shtyp të Komisionit Evropian e konfirmoi zëdhënësja Maja Koçijançiç, e cila prapë se prapë nuk konfirmoi nëse ekziston mundësia për një takim të ri liderësh në Bruksel ose Shkup të cilën përsëri do ta kishte ndërmjetësuar euro komisari  për zgjerim Johannes Hahn.

– Ne jemi të njoftuar hollësisht dhe jemi seriozisht të brengosur me vendimin e presidentit Ivanov për faljen e një numri të madh të politikanëve dhe zyrtarëve të cilit ishin lëndë e hetimeve kriminalistike. Ky vendim rrezikon të prodhojë klimë të pandëshkueshmërisë, e minon sundimin e së drejtës dhe vitet e shumta të investuara në vend dhe nga bashkësia ndërkombëtare dhe mund ta keqësojë krizën ekzistuese politike, theksoi zëdhënësja Kocijançiç./Telegrafi/