Bashkimi Afrikan pezullon Nigerin me efekt të menjëhershëm pas grushtit të shtetit të 26 korrikut

Bashkimi Afrikan e ka pezulluar Nigerin nga blloku kontinental me efekt të menjëhershëm, i fundit nga një numër sanksionesh ndaj vendit të Afrikës Perëndimore që nga grushti i shtetit të muajit të kaluar.

Vendimi, i shpallur të martën pas një takimi të Këshillit të Paqes dhe Sigurisë të BA në kryeqytetin etiopian Addis Abeba, vjen pasi disa vende perëndimore ndërprenë ndihmën për Nigerin për shkak të një grushti shteti të 26 korrikut që përmbysi presidentin Mohamed Bazoum, shkruajnë mediat e huaja, përcjell Telegrafi.

Bazoum ka qenë në arrest shtëpiak që nga marrja e pushtetit të orkestruar nga anëtarët e gardës së tij presidenciale.

Komuniteti Ekonomik i Shteteve të Afrikës Perëndimore (ECOWAS) vendosi gjithashtu sanksione dhe javën e kaluar ra dakord për një “ditë D” për të filluar një ndërhyrje ushtarake përmes një force sulmi rajonale tashmë të aktivizuar.

ECOWAS tha se përdorimi i forcës do të ishte “zgjidhja e fundit” pas shterimit të kanaleve diplomatike për negociata.

Të hënën, ky organ hodhi poshtë një propozim nga qeveria ushtarake e Nigerit për të mbajtur zgjedhje brenda tre viteve.

Megjithatë, BA tha se po rishikonte planin e veprimit të ECOWAS dhe u bëri thirrje të gjitha vendeve anëtare dhe komunitetit ndërkombëtar që të mos ndërmarrin asnjë veprim për të legjitimuar qeverinë ushtarake të Nigerit.

“Ne po studiojmë vendimin e ECOWAS për të përgatitur forcat për vendosjen në Niger dhe Komisioni Afrikan do të vlerësojë pasojat e tij”, thuhet në deklaratë. “Ne refuzojmë me forcë çdo ndërhyrje të jashtme nga çdo palë apo vend në punët e kontinentit, duke përfshirë kompanitë private ushtarake”. /Telegrafi/