Balotelli, nga një i ‘zhdukur’ tek kapiten i Italisë!

Mario Balotelli pritet ta marrë shiritin e kapitenit te Kombëtarja e Italisë.

Mund të duket paradoksale për mënyrën sesi kanë rrjedhur ngjarjet, por nëse zbatohen me përpikëri rregullat, atëherë Balotelli do të jetë kapiteni i ri i Kombëtares së Italisë.

Në mungesë të Gianluigi Buffonit dhe Daniele De Rossit, lideri i ri i kaltër mbetet Leonardo Bonucci, por meqë mbrojtësi i Milanit me siguri nuk do t’i luajë të plota takimet e programuara para Botërorit, shiriti do t’i kalojë SuperMarios.

Lexo po ashtu Zyrtare: Roberto Mancini, trajner i ri i Italisë

Tek Italia kapiteni i skuadrës zgjidhet në bazë të numrit të ndeshjeve (këtë praktikë ka ndjekur edhe Christian Panucci te kuqezinjtë) dhe hierarkisë, ndaj pas Bonuccit radha i vjen Balotellit, përcjell Supersport.

Roberto Mancini e riktheu në përfaqësuese, duke i rezervuar edhe një surprizë të këndshme, që do ta motivonte për të dhënë maksimumin dhe shmangur sjelljet e papërshtatshme, që e kanë penalizuar shumë në karrierën e tij.

Lexo po ashtu Mancini zbulon listën e parë si trajner i Italisë për tri miqësore luksi - kthehet Balotelli, mungon De Rossi

Pra, në një nga tri miqësoret e para të epokës “Mancini”, kundër Arabisë Saudite, Holandës dhe Francës, nuk do të jetë çudi nëse shohim Balotellin me statusin e kapitenit.

Sulmuesi i Nice, i cili ka luajtur në 33 ndeshje me Italinë, është zyrtarisht zëvendës-kapiten bashkë me Mattia De Sciglion (është 2 vjet më i vogël se Balo), diçka e pabesueshme kur mendon se vjen pas përjashtimit katërvjeçar nga përfaqësuesja.