Astronomët kanë zbuluar një objekt qiellor mahnitës që lëshon shpërthime të fuqishme të valëve të radios dhe rrezeve X, secila prej dy minutash, duke u përsëritur çdo 44 minuta.
Zbulimi shënon një moment historik në hulumtim, pasi është rasti i parë në të cilin rrezet X janë shoqëruar me një objekt që mund t'i përkasë një klase të re trupash qiellorë.
Bëhet e ditur se astronomët zbuluan objektin e parë të tillë në vitin 2022, dhe deri më sot janë regjistruar më pak se dhjetë, shkruan CNN, përcjell Telegrafi.
"Transientët janë një klasë e re objektesh kozmike që lëshojnë shpërthime të forta radio çdo disa minuta deri në disa orë", tha Dr. Andy Wang nga Curtin Institute of Radio Astronomy.
"Ne ende nuk e dimë saktësisht se çfarë janë këto objekte ose si prodhojnë sinjale kaq të pazakonta."
Objekti, i quajtur ASKAP J1832–0911, ndodhet rreth 15,000 vite dritë nga Toka, në galaktikën tonë.
Rrezatimi me rreze X, i zbuluar duke përdorur teleskopin Chandra të NASA-s, mund të ndihmojë astronomët të kuptojnë më mirë natyrën e këtyre objekteve intriguese dhe sjelljen e tyre pulsuese.
“Rrezet X zakonisht vijnë nga rajone jashtëzakonisht të nxehta dhe energjike, që do të thotë se diçka dramatike ka ndodhur me objektin”, tha Wang, autori kryesor i studimit të botuar në revistën Nature.
“Nëse këto objekte me të vërtetë mund të lëshojnë rreze X, të cilat mbartin dukshëm më shumë energji sesa valët e radios, kjo do të thotë se ato janë më energjike sesa mendohej më parë”, shtoi Wang.
Bëhet e ditur se shkencëtarët tani po përpiqen të zbulojnë burimin e valëve të radios dhe rrezeve X të emetuara nga ASKAP J1832-0911, pasi ato nuk përshtaten me asnjë kategori të njohur trupash qiellorë.
Vëzhgimet e ardhshme mund të zbulojnë temperaturën dhe madhësinë e objektit. /Telegrafi/
