ASH kërkon shkurtimin e orës policore dhe masa të reja për mbrojtje nga coronavirusi

Aleanca për Shqiptarët përmes një kumtese ka propozuar orar të ri për orën policore dhe masa të reja për mbrojtje nga coronavirusi.

Nga kjo parti propozojnë që masat në vend të shënojnë valën e dytë të lehtësimeve, edhe atë duke u nisur nga shkurtimi i orës policore nga ora 23:00 deri 05:00.

“E dimë se ekonomia e vendit tonë nuk mund të durojë edhe gjatë kohë me këtë tempo të punës, prandaj duke respektuar masat mbrojtëse(distanca, maska, doreza)propozojmë që të fillohet me hapjen e bizneseve siç janë restorantet, kafiteritë dhe biznese të ngjashme që janë mbyllur për shkak të virusit”.

“Megjithëse turizmi në vend nuk është në nivelin që duhet të jetë, prapë se prapë është e pamohueshme ndihmesa që ky sektor sikurse edhe hoteleria dhe transporti i japin ekonomisë së vendit, të cilat njëkohësisht janë edhe veprimtaritë më të goditura nga kriza shëndetësore-ekonomike”, thonë nga ASh.

Ata kërkojnë që të punësuarit në veprimtarit e turizmit dhe hotelirsë të mund të sigurojnë ekzistencën e familjeve të tyre, më së paku që Qeveria mund të bëj për veprimtaritë më të goditura është të ofroj subvencionim 100 për qind të kontributeve të pagave të punëtorëve në nivel të pagës minimale për çka nga arka shtetërore do të duhej të ndaheshin 15,6 milion euro.

“Harxhimi i parave nga arka e shtetit nuk ka se si të jetë më e arsyeshme se t’ju ndihmohet atyre që më së shumti janë prekur nga kriza e shkaktuar nga pandemia. Lehtësimi i masave të qarkullimit, ndihma shtetërore për veprimtaritë e goditura dhe fillimi gradual me pune i bizneseve do të ishin bazë e mirë për të shpëtuar ekonominë e brishtë të vendit nga recesioni”, thuhet në kumtesën e ASh-së.