Ambasadorja e Izraelit në Shqipëri: Na mbështesni të përdorim të drejtën e vetëmbrojtjes

Izraeli është kthyer në një lajm botëror, pas nisjes së sulmeve vdekjeprurëse të Hamasit. E gjithë politika shqiptare reagoi një ditë më parë, duke dënuar me forcë këto sulme të befasishme.

Ambasadorja e Izraelit në Tiranë, Galit Peleg, në një intervistë ekskluzive për topchannel, tregon me detaje gjithçka çfarë po ndodh në vendin e saj. Ajo i jep përgjigje një sërë pyetjeve, duke mos nguruar të flasë edhe për rolin e Shërbimit Sekret Izraelit në këtë ngjarje, sikurse ka edhe një kërkesë specifike drejtuar qeverisë shqiptare.

Shkëlqesi ambasadore. Fillimisht ngushëllime për jetët e humbura nga ky sulm në vendin tuaj. Tashmë Hamas ka marrë përgjegjësinë, por a ka aktorë të tjerë të përfshirë?

Ambasadorja Galit Peleg: Më lejoni t’ju them që në fillim se ndryshe nga sulmet e tjera terroriste, këtë herë Izraeli është në luftë.

Si i keni parë qëndrimet e udhëheqësve të Shqipërisë duke e dënuar këtë sulm?

Ambasadorja Galit Peleg: Kjo është një mundësi e mirë për të falënderuar udhëheqjen shqiptare, pasi ishin ndër të parët të dënonin publikisht terrorizmin e Hamasit.

Ne pamë qëndrimet e kryeministrit Edi Rama, të presidentit dhe ministrave. Unë kam marrë shumë telefonata me mesazhe mbështetëse për popullin e Izraelit, jo vetëm nga qeveria por edhe opozita.

Më vjen mirë që për këtë çështje nuk ka debat mes qeverisë dhe opozitës në Shqipëri. Faleminderit për këtë mbështetje të fortë. Çfarë ne presim si ndihmë prej qeverisë shqiptare është vijimi mbështetjes së Izraelit në të drejtën për tu vetëmbrojtur.

Kur Izraeli të veprojë për këtë duhet të na jepni mbështetje në mënyrë për ta vënë Hamasin atje ku meriton të jetë./TCH/