Njohësi i çështjeve të emergjencave dhe njëherësh Drejtor Ekzekutiv i Qendrës Kërkimore për Politika të Sigurisë (SPRC), Tahir Ahmeti  ka thënë se institucionet e vendit nuk duhet të presin përkeqësimin e motit dhe të reshurat atmosferike që shkaktojnë vërshime e pastaj të reagojnë.

Ahmeti përmes një postimi në Facebook, ka shkruar se duhen masa të vazhdueshme preventive dhe parandaluese duke filluar nga rregullimi i shtretërve të lumenjve.

Postimi i plotë:

Institucionet e Kosovës si ato qendrore ashtu edhe ato lokale, varësisht prej përgjegjësive, nuk duhet që të presin përkeqësimin e motit dhe të reshurat atmosferike që shkaktojnë vërshime dhe tek pastaj të reagojnë.
Duhen masa të vazhdueshme preventive dhe parandaluese, duke filluar nga rregullimi i shtretërve të lumenjve, kanaleve kulluese apo përroskave në vendet rurale si dhe rregullimi i infrastrukturës nëntokësore në vendet urbane, në mënyrë që të reshurat mos të shkaktojnë përmbytje në vazhdimësi, sa herë që janë më të theksuara, pasi po shihet se ka probleme të mëdha në ketë aspekt.
Këto vërshime po shkaktojnë dëme të mëdha, por edhe po rrezikohet jeta e qytetarëve të vendit. /Telegrafi/