Abdullahu: SHBA-të duket se nuk janë shumë të interesuara për koalicionin VV-LDK

Analisti Faton Abdullahu, duke komentuar zhvillimet e fundit politike në Kosovë, ka thënë se dy forcat politike që kanë dalë fituese në zgjedhje kanë përgjegjësi të madhe për vonimin e formimit të institucioneve për faktin se në Ballkan janë duke ndodhur zhvillime dinamike.

Abdullahu, në “Dossier D” në RTV Dukagjini, ka thënë se janë duke lindur dyshime se mos Vetëvendosje dhe LDK kanë dallime tjera të mëdha e nuk është çështja e Presidentit ajo që po vonon formimin e institucioneve.

“Për koalicionin Vetëvendosje-LDK nuk është se janë shumë të interesuara SHBA-të dhe faktori tjetër ndërkombëtar. Deklaratat e tyre nuk janë të forta si ishin në të kaluarën. Kujtojmë në të kaluarën faktori ndërkombëtar ishte shumë i përfshirë në ndërtimin e koalicioneve”.

Abdullahu hedh dyshime si dialogu me Serbinë është një fushë ku LDK dhe Vetëvendosje kanë dallime të mëdha e që sipas tij edhe ndërkombëtarët mund të kenë dyshime të ky koalicion.

Analisti ka thënë se Vetëvendosje ka një qasje që kur është në disavantazh në tavolinë, ajo del në publik me detaje për të rikuperuar pozicion ndërsa sipas tij LDK-ja ka qasje të kundërt, do që bisedimet mes palëve të mos shfaqen në publik.

Ai thotë se LDK pret nga Vetëvendosje të lëshoj pe për presidentin, ndryshe thotë se ka zëra që këto dy parti kanë pretendime edhe për kreun e AKI-së./Telegrafi/