Nikollovski: Kroacia duhet ta respektojë Marrëveshjen për stabilizim dhe asocim që Maqedonia e ka kontraktuar me BE-në

Ministria e Bujqësisë, Pylltarisë dhe Ekonomisë së Ujërave do të dorëzojë notë deri tek Ministria kroate e Bujqësisë për ndalimin e Rregullores për kontroll gjatë importit të frutave dhe perimeve që është sjellë më 15 korrik 2017. Siç kumtoi ministri resor Lupço Nikollovski, një notë do t’u dorëzohet edhe institucioneve kompetente të KE-së në Bruksel, përcjell Telegrafi Maqedoni.

Rregullorja do të shqyrtohet edhe sonte në seancë qeveritare, ndërsa të hënën pritet qëndrim i përbashkët të sjellin edhe vendet e rajonit.

”Me rregulloren e re të cilën e solli Kroacia në mënyrë të konsiderueshme rriten shpenzimet gjatë eksportit të frutave dhe perimeve të freskëta të Maqedonisë, që do të ndikojë mbi rritjen e çmimit të fundit të kostos së produktit. Me çmime të rritura, frutat dhe perimet e Maqedonisë do të jenë jokonkurrente në treg”, theksoi Nikollovski.

Lexo po ashtu Kroacia pengon importin e pemëve dhe perimeve nga Maqedonia

Sipas tij, me sjelljen e Rregullores bëhet edhe diskriminimi ndaj vendeve anëtare të BE-së për të cilat shpenzimet për mbikëqyrje inspektuese mbeten 90 kuna, ndërsa për vendet e treta, të cilat nuk janë anëtare të BE-së shpenzimet do të jenë 2 mijë kuna, njofton AIM.

Nikollovski shtoi se Kroacia si vende anëtare e BE-së duhet ta respektojë Marrëveshjen për stabilizim dhe asocim që Maqedonia e ka kontraktuar me BE-në dhe në pajtim me të cilën BE do t’i pezullojë taksat doganore dhe të tjera të cilat kanë efekt të njëjtë për importimin e produkteve bujqësore me origjinë nga RM-ja. /Telegrafi/