Vrau kunatin pasi i përdhunoi vajzën, Fatmir Tarellari kërkon lirimin nga burgu

50-vjeçari shqiptar Fatmir Tarellari, i cili prej disa muajsh ndodhet në burg për vrasjen e kunatit të tij, ka kërkuar përmes avokatëve lirimin nga qelia.

Sipas mediave të huaja, Tarellari ekzekutoi kunatin 33-vjeçar, Erjon Pelivani, pasi ky i fundit i kishte përdhunuar vajzën në mënyrë sistematike dhe më pas e shantazhonte duke i kërkuar shuma monetare.

50-vjeçari po mbahet në një pavijon të posaçëm të një prej burgjeve të Larisës, jo me të burgosur me dënime të rënda, ndërsa ruan pothuajse çdo ditë kontakte me tre fëmijët e tij.

Sipas Tarellarit, përdhunimi i vajzës nga 33-vjeçari Erjon Pelivani ka ndodhur teksa në dhomën ngjitur ndodhej djali i tij tashmë 9-vjeçar. Tarellari u vetëdorëzua në polici pasi vrau kunatin e tij, Erjon Pelivani.

Tarellari ekzekutoi Pelivanin disa ditë pasi vajza e tij 18-vjeçare i rrëfeu se ishte përdhunuar nga vëllai i njerkës prej vitesh.

Ngacmimet ndaj të miturës kishin nisur në moshën 9-vjeçare ndërsa përdhunimet ishin regjistruar nga mosha 12-14 vjeç, deri në moshën 19-vjeçare.

Gjithashtu vajza ishte kërcënuar nga 33-vjeçari se do të publikonte pamje gjatë akteve seksuale nëse ajo nuk i jepte para. Nga shpenzimi dhe kërkimi i parave ndaj familjarëve, doli në dritë edhe ngjarja.

50-vjeçari pohoi gjithashtu se vajza e tij arriti në pikën e vetëvrasjes pas asaj që kaloi nga daja i saj 33-vjeçar. Ai theksoi se jetesa e djalit të mitur 9 vjeç dhe vajzës së tij, e cila është studente në Universitet, varen vetëm nga puna e tij, pasi nuk kanë të ardhura të tjera.

Një psikiatre që ekzaminoi 18-vjeçaren, para vrasjes së ndodhur më 9 janar, kishte konstatuar se vajza vuan nga stresi post-traumatik, pas vitesh abuzime seksuale të përsëritura përdhunimi dhe shantazhi, ndërsa ajo monitorohet çdo ditë dhe ka nevojë për trajtim të menjëhershëm.

Në mikroskopin e hetimeve është edhe videoja prej 36 sekondash me të cilën 33-vjeçari dyshohet se shantazhonte 18-vjeçaren.

Siç ka dëshmuar edhe vetë ajo para autoriteteve, ajo është dërguar pa e ditur në shtëpinë e prindërve të saj. Ajo vetë nuk ishte më shumë se 14 vjeç, ndërsa në video duken qartë duart dhe tatuazhi i 33-vjeçarit./Euronews Albania