Veriu mes tensioneve dhe mbajtjes së zgjedhjeve të jashtëzakonshme

Më 23 prill pritet të mbahen zgjedhje të jashtëzakonshme për kryetar të komunave të Mitrovicës së veriut, Zveçanit, Zubin Potokut dhe Leposaviqit si dhe zgjedhje të parakohshme për dy kuvendet komunale, në Zveçan dhe Leposaviq.

E kur kanë mbetur edhe tetë ditë nga mbajtja e tyre, të premten e 14 prillit, KQZ miratoi listën e qendrave të votimit.

Sipas vendimit të KQZ-së numri i përgjithshëm i qendrave të votimit në këto katër komuna është 19 me gjithsej 34 vendvotime, prej tyre 6 janë qendra votimi të rregullta me gjithsej 6 vendvotime, ndërsa 13 qendra të tjera votimi janë alternative me gjithsej 28 vendvotime, shkruan Telegrafi.

Së fundmi Komisioni Qendror i Zgjedhjeve ka bërë publike edhe fletëvotimet për këto zgjedhje.

Lexo po ashtu KQZ publikon fletëvotimet për zgjedhjet në veri

Vendimi për zgjedhjet është marrë pasi kryetarët e këtyre komunave, bashkë me serbë të tjerë, më 5 nëntor të vitit të kaluar dhanë dorëheqje, në shenjë kundërshtimi ndaj vendimit të Qeverisë së Kosovës për të nisur procesin për riregjistrimin e makinave me targa të paligjshme serbe.

Ky vendim prodhoi incidente dhe shtyrjen e zgjedhjeve që fillimisht ishin caktuar të mbaheshin më 18 dhjetor të vitit të kaluar.

Bojkotimi i zgjedhjeve nga partitë serbe dhe incidentet në veri

Lista Serbe, por edhe partitë e tjera që përfaqësojnë serbët në Kosovë kanë deklaruar që nuk do të marrin pjesë në këto zgjedhje, shkruan Telegrafi.

Lidhur me këtë bojkot të zgjedhjeve nga partitë serbe ka reaguar edhe Bashkimi Evropian. Një zëdhënës në Bruksel ka thënë se është për keqardhje bojkotimi i zgjedhjeve nga përfaqësuesit politikë të serbëve lokalë.

“Prandaj është shumë zhgënjyese që Lista Serbe dhe partitë e tjera që përfaqësojnë serbët e Kosovës, kanë vendosur të mos marrin pjesë në zgjedhjet lokale të planifikuara për 23 prill në katër komunat veriore”, kanë deklaruar nga BE-ja.

E në prag të mbajtjes së zgjedhjeve në katër komunat veriore, ditëve të fundit ka pasur shtim të incidenteve në këtë pjesë.

Dhjetëra vetura deri më tani janë djegur në veri të vendit, shumica nga to të riregjistruara me tabela RKS (Republika e Kosovës).

Lexo po ashtu Plagosja në veri, suspendohen katër zyrtarë policorë - njëri dyshohet se gjuajti me armë

E një gjë e tillë është parë si sinjal që në atë pjesë të vendit ekzistojnë tendenca për tensionim e përshkallëzim të situatës.

Të hënën e 10 prillit në orët e mbrëmjes një person është plagosur me armë zjarri në veri të Mitrovicës. Policia e Kosovës pas hetimeve të pandërprera ka arritur të sigurojë dëshmi se një zyrtar policor se është përfshirë në gjuajtje me armë zjarri.

Si rezultat i hetimeve të pandërprera dhe i angazhimeve të njësiteve policore në vendin e ngjarjes, si dhe si rezultat i ekzaminimit të dëshmive të siguruara, është arritur të sigurohen dëshmi të cilat tregojnë dyshimet për përfshirje të mundshme të një zyrtari policor në gjuajtje me armë zjarri. Bazuar në informacionet dhe dëshmitë e siguruara bëhet e ditur se janë marrë masa të suspendimit ndaj zyrtarit policor, pasi i njëjti nuk kishte raportuar lidhur me rastin dhe për përfshirjen e tij në rast”, njoftoi PK-ja.

Sinjalet për pengim të zgjedhjeve dhe përgjigja e institucioneve të Kosovës

Kryeministri i Kosovës, Albin Kurti, ditë më parë tha se institucionet janë duke bërë të gjitha përgatitjet për organizmin e zgjedhjeve të jashtëzakonshme, më 23 prill, në katër komunat në veri të Kosovës: Mitrovicë e Veriut, Zveçan, Zubin Potok dhe Leposaviq.

I pyetur nga deputetët e opozitës në njërën prej seancave të Kuvendit të Kosovës, Kurti, tha se janë ndarë mjetet e nevojshme për këtë proces dhe se askush nuk duhet dhe nuk mund të cenojë të drejtën e qytetarëve për të zhvilluar një proces të rregullt zgjedhor.

“Pluralizmi politik dhe mbi të gjitha e drejta e votimit lirshëm e papengesa të komunitetit serb janë të domosdoshme. Kushdo që vijon ta cenojë këtë të drejtë themelore nuk ka çfarë të pres tjetër përveçse përgjigjen e institucioneve tona me forcën e ligjit”, tha Kurti.

Kryetari i Kuvendit të Kosovës, Glauk Konjufca duke folur për situatën në veri dhe për mbajtjen apo jo të zgjedhjeve në këtë pjesë, u shpreh se “Kosova nuk mund të kushtëzohet nga Serbia për mbajtjen apo jo të këtyre zgjedhjeve”.

Lexo po ashtu Zgjedhjet në veri, Konjufca: Nuk do të shtyhen më

“Nuk mund të kushtëzohemi prej (presidenit të Serbisë, Alleksandar) Vuçiqit, prej beogradit, prej Serbisë, që ata të vendosin se kur mundtë ketë zgjedhje ose jo në Kosovë. Zgjedhjet janë caktuar. Një kompromis i mëhershëm ka ndodhur dhe zgjedhjet janë shtyrë një herë. Ato janë shtyrë me kërkesën e bashkësisë ndërkombëtare. Ne kemi marrë garancinë prej tyre se nuk do të shtyhen më shumë se një herë”, tha Konjufca.

Në anën tjetër ministri i Punëve të Brendshme të Kosovës, Xhelal Sveçla, tha se është i bindur që zgjedhjet e jashtëzakonshme në katër komunat në veri të Kosovës do të përfundojnë të suksesshme.

Sveçla tha se Policia e Kosovës dhe e gjithë Ministria e Brendshme janë në dispozicionin e Komisionit Qendror të Zgjedhjeve për të organizuar votimet.

“Për ne është imperativ që këto zgjedhje të mbahen në një atmosferë të qetë, të sigurt, qoftë për organizatorët, por edhe për vetë qytetarët atje. Janë çështje të vendimeve politike të subjekteve të caktuara të cilat duan apo nuk duan të marrin pjesë në zgjedhje. Por, me rëndësi është që institucionet e Kosovës janë duke vijuar me organizimin e procesit zgjedhor, ashtu siç është më së miri. Jam i bindur që i gjithë ky proces do të përfundojë i qetë, i suksesshëm duke tejkaluar edhe problemet të cilat i përmenda”, tha Sveçla.

Kujtojmë se organizata joqeveritare Demokracia në Veprim (DnV), ka thënë se rrethanat aktuale, “nuk mundësojnë organizimin dhe mbajtjen e zgjedhjeve në veri të Kosovës”, në përputhje me standardet për zgjedhje të lira.

Sipas kësaj organizate, situata në komunat veriore, Mitrovicë e Veriut, Leposaviq, Zveçan dhe Zubin Potok, është e brishtë.

Lista Serbe, partia kryesore e serbëve në Kosovë, nuk ka aplikuar që të marrë pjesë në këto zgjedhje. Në garë për kryetar të këtyre komunave janë 11 kandidatë nga katër subjekte politike, prej të cilëve vetëm dy janë të komunitetit serb. /Telegrafi/