Vendet afrikane tërheqin diplomatët nga Izraeli – bëjnë thirrje për armëpushim të menjëhershëm

Afrika e Jugut dhe Çadi kanë njoftuar se do të tërheqin diplomatët nga Izraeli për “konsultime” në përgjigje të luftës Izrael-Hamas.

“Qeveria e Afrikës së Jugut ka vendosur të tërheqë të gjithë diplomatët e saj në Tel Aviv për konsultim”, ka thënë ministri Khumbudzo Ntshavheni të hënën në një konferencë shtypi për të njoftuar rezultatin e një takimi të kabinetit të mbajtur më 1 nëntor.

Sipas asaj që i ka thënë Qeveria e Afrikës së Jugut mediumit prestigjioz CNN, bëhet fjalë për tërheqjen e tre diplomatëve nga Izraeli.

“Kabineti ka vënë në dukje gjithashtu deklaratat e vazhdueshme përçmuese të ambasadorit izraelit në Afrikën e Jugut për ata që po kundërshtojnë mizoritë dhe gjenocidin e qeverisë izraelite”, tha Ntshavheni, duke shtuar se roli i ambasadorit “po bëhet shumë i paqëndrueshëm”.

“Një gjenocid nën mbikëqyrjen e komunitetit ndërkombëtar nuk mund të tolerohet”, ka vlerësuar Ntshavheni gjatë konferencës.

Ndryshe, në mars, parlamenti i Afrikës së Jugut miratoi një rezolutë “për të zvogëluar nivelin” e marrëdhënieve me Izraelin.

Lexo po ashtu Ushtria izraelite thotë se e ka ndarë Gazën në dysh

Qeveria e Afrikës së Jugut gjithashtu është shprehur ashpër në dënimin e saj të operacioneve të Izraelit në Gaza.

“Është një krim lufte për Izraelin që të shënjestrojë drejtpërdrejt civilët palestinezë në spitale, ambulanca, shkolla, ndërtesa banimi dhe në makinat e tyre private”, tha ministria e jashtme të shtunën.

Ministria përsëriti thirrjen e Afrikës së Jugut për një “armëpushim të menjëhershëm”.

Ndërkohë, Çadi tërhoqi të ngarkuarin me punë të vendit në Izrael më 4 nëntor si reagim ndaj konfliktit në Gaza, sipas një deklarate të postuar në Facebook nga Ministria e Punëve të Jashtme të Çadit.

Vendimi për të tërhequr diplomatin e lartë për konsultime u mor si “indinjatë” për konfliktin në vazhdim, thuhet në një postim në faqen e internetit të presidencës së Çadit të hënën.

“Çadi dënon humbjen e jetëve njerëzore të shumë civilëve të pafajshëm dhe bën thirrje për një armëpushim që çon në një zgjidhje të qëndrueshme të çështjes palestineze”, thuhet në deklaratën e zëdhënësit të qeverisë. /Telegrafi/