“Më i veçantë ishte Ozil”, ish-ylli i Real Madridit shpjegon pse e konsideronte Mesutin me ndikim më të madh se Ronaldo te Los Blancos

Ish-mesfushori i Real Madridit, Sami Khedira e ka vlerësuar lartë ish-bashkëlojtarin e tij, Mesut Ozil, duke e cilësuar me më shumë ndikim se Cristiano Ronaldo te klubi nga Santiago Bernabeu.

Duke folur për gazetën Marca, Khedira tregoi arsyen pse ai e konsideron Mesut Ozilin si më ‘special’ në Real Madrid sesa Ronaldon.

“Të gjithë e kuptojnë Cristiano Ronaldon. Për të fituar ndeshjet, Cristiano ishte njeriu kryesor sepse ai kurrë nuk dështoi. Ai ishte gjithmonë aty. Na duhej një gol, topi shkonte te Cristiano”, ka thënë fillimisht Khedira.

“Por, lojtari më i veçantë për mua ishte Mesut Ozil. Dhe e shpjegoj me largimin e tij. Ditën që Mesut u largua, ne të gjithë i thamë Florentino Perezit: ‘Pse po e shet atë?”.

“Të gjithë ia thamë. Benzema, Cristiano, Ramos… Ozil ishte një gjeni absolut; ai ishte një magjistar i vërtetë”.

“Unë luajta pas tij, dhe ju i jepni një pasim të keq, dhe ai e kontrollonte topin me lehtësi… Unë kurrë nuk kam parë një lojtar me atë klasë dhe atë cilësi, me të vërtetë”, përfundoi gjermani.

Ozil u largua nga Real Madrid në vitin 2013 pasi kaloi tre sezone me klubin, pasi shënoi 27 gola dhe siguroi 81 asistime në 159 paraqitje për Los Blancos. /Telegrafi/