Vazhdojnë përgatitjet për festivalin “Sunny Hill”

Përhapja e virusit COVID-19 në mbarë botën ka bërë që të anulohen shumë prej ngjarjeve më të mëdha përfshirë ato në sport, kulturë e muzikë.

Megjithëse së fundmi ky virus vdekjeprurës ka prekur edhe trojet shqiptare, vë në dyshim mbajtjen e festivaleve apo koncerteve edhe në vend.

Duke qenë se “Sunny Hill” cilësohet të jetë një prej festivaleve më të mëdha e më të suksesshëm në Kosovë, bëhet e ditur se përkundër kësaj përgatitjet rreth tij tashmë kanë filluar.

Lidhur me këtë, njëri prej organizatorëve të “Sunny Hill”, Alban Kastrati, në një prononcim për Telegrafin thotë se kanë filluar me përgatitjet, por varet gjithçka prej rrethaneve që krijohen në vazhdim.

“Po presim, ne jemi duke i bërë të gjitha përgatitjet për të mbajtur, mirëpo varemi prej rrethanave që krijohen”, ka thënë Alban Kastrati për Telegrafin.

“Të gjitha përgatitjet janë në vijim e sipër, psh shitjet e biletave, aktivitetet brenda festivalit, dhe ngjarjet tjera përcjellëse”, shton më tutje ai.

Lexo po ashtu Të gjitha lajmet nga Sunny Hill Festival

Kastrati po ashtu tregon se biletat do jenë në shitje së shpejti dhe se këtë vit vijnë me disa ndryshime sa i përket tyre.

“Sa më shpejt që të ketë ambient për të filluar me shitjen e biletave, ne jemi gati. Do kemi lloje të reja te biletave, kategori e grupe të reja të biletave”, vazhdon ndër tjerash Kastrati.

Festivali “Sunny Hill” përndryshe nga ky vit pritet të mbahet në Qendrën e Panaireve në Bernicë. /Telegrafi/