Van Dijk: Duhet të jemi krenarë me arritjet, besojmë në kualifikim  

Virgil van Dijk këmbëngul që Liverpooli nuk është i shqetësuar që potencialisht mund të përfundojë sezonin pa asnjë trofe pas humbjes së tyre të rëndë në Barcelonë.

Djelmoshat e Jurgen Klopp u mposhtën në aktin e parë të gjysmëfinales së Ligës së Kampionëve me rezultat 3-0 në ndeshjen e parë në Camp Nou të mërkurën.

Kjo humbje ka lënë pak shpresa të Reds që të kalojnë në finale, ndërsa gjasat janë të mëdha që ekipi nga Anfield të mbetet edhe pa titullin e Ligës Premier.

Lexo po ashtu Klopp: Luajtëm shumë mirë, nuk mund të luajmë më mirë se kaq

“Ne nuk do të mendojmë për këtë [mbetjen pa trofe]” tha fillimisht Van Dijk për DAZN pas humbjes në Barcelonë.

“Kemi bërë një sezon të mirë dhe do të përpiqemi të fitojmë diçka dhe nëse nuk ndodh, do të vazhdojmë të punojmë”.

“Duhet të jemi krenar për veten, po luajmë kundër një prej ekipeve më të mira në botë dhe natyrisht në ligë po luajmë gjithashtu kundër një prej ekipeve më të mira në botë”.

“Jemi në të dy garat dhe mendoj se shumë, shumë skuadra do të donin të jenë në pozitën tonë”.

Lexo po ashtu Messi: Nuk ka përfunduar asgjë, së bashku ia arrijmë

“Çdo gjë është e mundshme në futboll, patjetër që besojmë në kualifikim”.

“Ne kurrë nuk do të dorëzohemi dhe treguam sot se patjetër që mund të krijojmë shanse të mëdha kundër tyre, e vetmja gjë është që ne duhet të përpiqemi dhe t’i shënojmë ato shanse”, përfundoi holandezi. /Telegrafi/