Ashley Biden, vajza e ish-presidentit amerikan Joe Biden, të dielën bëri një deklaratë publike në rrjetet sociale duke akuzuar bashkëshortin e saj, mjekun Howard Krein, se ka një lidhje jashtëmartesore – vetëm një ditë para se të dorëzonte kërkesën për divorc pas 13 vitesh martesë.
Në Instagram Story, ajo publikoi një fotografi të një çifti të kapur për dore, të shkrepur nga pas, duke e shoqëruar me mbishkrimin: “Bashkëshorti im dhe e dashura e tij po ecin të kapur për dore”. Si sfond muzikor kishte zgjedhur këngën “Another” nga Notorious B.I.G. dhe Lil’ Kim, që flet për tradhtinë. Postimi u fshi pak pas publikimit.
Të hënën, 44-vjeçarja Ashley – punonjëse sociale dhe vajza e Zonjës së Parë Jill Biden – dorëzoi zyrtarisht kërkesën për divorc në Filadelfia. Më pas, ajo postoi sërish në Instagram një foto ku ecte në park duke treguar shenjën “OK” me dorë, ndërsa në sfond dëgjohej kënga Freedom e Beyoncé-s.
Ajo ndau gjithashtu një citim me mbishkrimin: “Një jetë e re, fillime të reja do të thonë edhe kufij të rinj. Mënyra të reja të qenit që nuk do të duken ose tingëllojnë si më parë”, duke përdorur si sfond muzikor këngën Freedom Time të Lauryn Hill.
Ashley Biden dhe Howard Krein u martuan në qershor 2012, pasi kishin nisur lidhjen në vitin 2010, kur u njohën përmes gjysmë-vëllait të saj, Beau Biden. Ata u fejuan në tetor 2011, gjatë një udhëtimi në Kaliforni, ku Krein e propozoi në perëndim të diellit. Ashley ka treguar më herët se Krein kishte kërkuar miratimin e Joe Biden për fejesën.
Joe Biden, sot 82 vjeç, nga martesa e tij e parë me Neilia Biden, kishte tre fëmijë: Beau, Hunter dhe Naomi. Në vitin 1972, Neilia dhe Naomi humbën jetën tragjikisht në një aksident automobilistik. /Telegrafi/
