Ukraina thotë se ka rimarrë tetë fshatra

Zëvendësministrja ukrainase e Mbrojtjes, Hanna Maliar, ka thënë të hënën se forcat e Ukrainës kanë rimarrë tetë vendbanime gjatë dy javëve të fundit, duke përfshirë Piatykhatky në rajonin e Zaporizhzhia.

Kështu, sipas mediave të huaja, përcjell Telegrafi, që nga fillimi i kundërofensive të Ukrainës që synonte rimarrjen e kontrollit të zonave të pushtuara nga forcat ruse, Maliar tha se Ukraina kishte liruar 113 kilometra katrorë territor.

Ndërkohë zyrtarët rusë thanë të hënën se granatimet në rajonin Belgorod të Rusisë, që ndodhet pranë kufirit me Ukrainën, plagosën shtatë civilë.

Lexo po ashtu Eksperti ushtarak zbulon pse Prigozhin mund të dëshirojë fshehurazi të shohë një fitore të Ukrainës ndaj Rusisë

Ndërsa Ministria britanike e Mbrojtjes tha në vlerësimin e saj të fundit të hënën se Rusia ka “shumë të ngjarë” të ridislokojë mijëra trupa nga brigjet lindore të lumit Dnipro për të shërbyer si përforcime për forcat ruse në zonat Bakhmut dhe Zaporizhzhia.

Ministria britanike e Mbrojtjes theksoi se masa “ka të ngjarë të pasqyrojë perceptimin e Rusisë se një sulm i madh ukrainas përgjatë Dnipro tani ka më pak gjasa pas rënies së digës Kakhovka dhe përmbytjeve”.

Këto deklarata vijnë në kohën kur Kombet e Bashkuara thanë se Moska ka refuzuar kërkesat e saj për të ndihmuar banorët e zonave të kontrolluara nga Rusia të Ukrainës jugore të prekura nga shembja e digës Kakhovka dhe u zotua të vazhdojë të angazhohet për të kërkuar qasjen e nevojshme. /Telegrafi/