Ukraina kërkon prej SHBA-së nga 500 raketa antitank dhe 500 kundërajror në ditë

Ukraina ka përditësuar listën e gjerë të asistencës ushtarake që po kërkon nga qeveria amerikane në ditët e fundit duke përfshirë qindra raketa më shumë kundërajrore dhe antitank sesa kërkohej më parë, sipas një dokumenti të ofruar për CNN që detajon artikujt e nevojshëm.

Ukrainasit kanë paraqitur lista të ngjashme javët e fundit, por një kërkesë e fundit e ofruar për ligjvënësit amerikanë duket se pasqyron një nevojë në rritje për raketa anti-ajrore Stinger të prodhimit amerikan dhe raketa antitank Javelin – me Ukrainën që thotë se i duhen çdo ditë 500 nga secila.

Në të dyja rastet, Ukraina po kërkon qindra raketa më shumë sesa ishin përfshirë në një listë të ngjashme të ofruar së fundmi për ligjvënësit amerikanë, sipas një burimi me njohuri për të dyja kërkesat.

Lista e re vjen pasi ukrainasit kanë pohuar se përballen me mungesa të mundshme të armëve në mes të një sulmi të vazhdueshëm rus – duke shkaktuar disa reagime nga zyrtarët e SHBA-së dhe NATO-s, të cilët theksojnë se më shumë ndihma ushtarake tashmë po shkon në vend.

Deri më 7 mars, më pak se dy javë pas pushtimit të Ukrainës nga Rusia, SHBA dhe anëtarë të tjerë të NATO-s kishin dërguar rreth 17 mijë raketa antitank dhe 2,000 raketa kundërajrore në Ukrainë.

E fundit e një ndihme sigurie prej 350 milionë dollarësh, e miratuar në fund të shkurtit, mbërriti në Ukrainë, tha një zyrtar i lartë i mbrojtjes, ndërsa dy paketat e ardhshme që arrijnë në 1 miliard dollarë tashmë kanë filluar të arrijnë.

Lista e ofruar për CNN detajon disa nevoja të tjera urgjente, duke përfshirë aeroplanë, helikopterë sulmues dhe sisteme kundërajrore si S-300.

Dy lloje aeroplanësh të prodhuar nga Rusia janë renditur në dokument, duke përfshirë një të projektuar për të ofruar mbështetje të ngushtë ajrore për trupat në terren. Ukraina ka kërkuar 36 nga secili aeroplan. /Telegrafi/