Ukraina bëhet importuesi më i madh i armëve në Evropë – SIPRI tregon edhe “goditjen” që ka pësuar Rusia

Vitet e fundit, eksportet e armëve të Rusisë pothuajse janë përgjysmuar dhe Franca e ka tejkaluar atë në renditjen e furnizuesve të armëve. Në të njëjtën kohë, Ukraina është bërë importuesi më i madh i armëve në Evropë.

Këtë e dëshmojnë të dhënat e Institutit Ndërkombëtar të Kërkimeve të Paqes në Stokholm (SIPRI), shkruajnë mediat e huaja, përcjell Telegrafi.

Në raportin e tij vjetor, SIPRI krahasoi eksportet e armëve në periudhën 2019-2023 me periudhën 2014-2018 dhe gjeti një sërë ndryshimesh dramatike.

Aty vihet re se eksportet e armëve të SHBA-së u rritën me 17% midis viteve 2014–18 dhe 2019–23, dhe pjesa e saj në totalin e eksporteve globale të armëve u rrit nga 34% në 42%.

Midis 2019 dhe 2023, Shtetet e Bashkuara dërguan armë të mëdha në 107 vende, më shumë se në çdo periudhë të mëparshme.

Shtetet e Bashkuara përbënin rreth 55% të armëve të importuara nga vendet evropiane në 2019-2023, që është 20% më shumë se në 2014-2018.

Franca zuri vendin e dytë midis eksportuesve, duke “zhvendosur” Rusinë.

Eksportet e saj të armëve u rritën me 47%, dhe pjesa e saj në furnizimet globale u rrit në 11% (7.2% në 2014-2018).

Rritja e eksporteve franceze të armëve ishte kryesisht për shkak të dërgesave të avionëve luftarakë në Indi, Katar dhe Egjipt.

Kështu, Rusia ka kaluar në vendin e tretë në renditjen e furnizuesve globalë të armëve.

Midis 2019 dhe 2023, eksportet e armëve nga Rusia pothuajse u përgjysmuan, me 53%. Pjesa e Rusisë në furnizimet globale u ul me 10%, duke u bërë e barabartë me atë të Francës.

Sipas raportit, gjatë pesë viteve të fundit, rënia e eksporteve ushtarake ruse ka qenë e shpejtë.

Ndërsa në vitin 2019, Rusia furnizoi me armë 31 shtete, në vitin 2023 ajo furnizoi vetëm 12.

Në të njëjtën kohë, pak më pak se dy të tretat e eksporteve të armëve të Rusisë shkuan në tri vende: Indi (34%), Kinë (21%) dhe Egjipt (7.5%).

“Ukraina u shfaq si importuesi më i madh evropian i armëve në 2019–23 dhe i katërti më i madhi në botë, pasi të paktën 30 shtete e furnizuan me armë të mëdha si ndihmë ushtarake që nga shkurti 2022”, thuhet në raport.

Pjesa e Ukrainës në importet globale të armëve ishte 4.9%, krahasuar me 0.1% në 2014-2018.

Në të njëjtën kohë, rritja e përgjithshme e importeve ushtarake gjatë kësaj periudhe arriti një rekord prej 6633%.

Sipas SIPRI, furnizuesit kryesorë të armëve në Kiev ishin Shtetet e Bashkuara (39%), Gjermania dhe Polonia (përkatësisht 14% dhe 13%).

Më herët, SIPRI deklaroi se pavarësisht rritjes së porosive për armë në mes të luftës së Rusisë kundër Ukrainës, të ardhurat totale të prodhuesve më të mëdhenj të armëve në vitin 2022 u ulën në krahasim me vitin e kaluar. /Telegrafi/