Udhëtuan me aeroplan për Havai edhe pse e dinin se janë të infektuar me COVID-19, policia arreston çiftin bashkëshortor pas aterimit në aeroport

Çifti bashkëshortor Wesley Moribe dhe Courtney Peterson nga Havai janë arrestuar gjatë fundjavës së kaluar, pasi kishin tentuar të kthehen në shtëpi me aeroplan, duke e ditur se kishin rezultuar pozitiv në testin e COVID-19, shkruan CNN.

Së bashku me fëmijën e tyre ishin në San Francisco, dhe dëshironin që me aviokompaninë United Airlines të kthehen në Havai, transmeton Telegrafi.

Sipas një raporti preliminar, çiftit bashkëshortor nga shtabi i karantinimit në aeroport u është thënë të mos futen në aeroplan dhe të izolohen, ka bërë të ditur policia e Havait.

Të vetëdijshëm që janë të infektuar me coronavirus, dyshja ishin futur në aeroplan dhe ishin kërcënim për shëndetin e të gjithë pasagjerëve, thuhet ndër tjera në kumtesë.

Moribe, 41-vjeç dhe Peterson, 46, janë arrestuar me të zbritur në tokë – nën dyshimin se kanë shkelur ligjin për “rrezikim të shëndetit të tjerëve”, por janë liruar nga paraburgimi duke paguar nga njëmijë dollarë secili.

Fëmija i tyre ishte dërguar nën përkujdesin e autoriteteve kompetente e për të gjitha është informuar edhe Shërbimi për mbrojtjen e fëmijëve, megjithatë nuk dihet nëse fëmija ka kontaktuar me babanë dhe nënën. /Telegrafi/