U raportua se ukrainasit përdorën armët belge për luftime brenda territorit të Rusisë, reagon kryeministri Alexander De Croo

Kryeministri belg Alexander De Croo njoftoi sot se Belgjika do t’i kërkojë Ukrainës sqarime mbi raportet se pushkët e prodhimit belg janë përdorur nga forcat ukrainase në një konflikt me trupat ruse në territorin rus.

“Ministria jonë e Mbrojtjes dhe agjencitë e saj të inteligjencës kanë filluar një hetim dhe po kërkojnë informacion për të përcaktuar saktësisht se çfarë ka ndodhur”, tha De Croo për Radio 1 të Belgjikës.

“Armët evropiane i dorëzohen Ukrainës me kusht që ato të përdoren në territorin ukrainas me qëllim të mbrojtjes së atij territori. Ne kemi kontrolle të rrepta për të kontrolluar nëse është kështu,” shtoi ai.

Lexo po ashtu E pranon edhe kreu i Wagnerit rus: Ukrainasit po rikthejnë territoret e humbura në Bakhmut

Siç raporton Reuters, De Croo u përmbajt nga komentet për pasojat e mundshme nëse raportet konfirmohen, transmeton Telegrafi.

“Nuk duhet të vrapojmë para demit”, tha kryeministri, më pas shtoi: “Por ne jemi duke e analizuar situatën dhe do ta merrnim shumë seriozisht”.

Washington Post raportoi të shtunën se luftëtarët anti-Kremlin që nisën një sulm përtej kufirit nga Ukraina në rajonin Belgorod të Rusisë muajin e kaluar, përdorën automjete taktike të ofruara fillimisht nga SHBA dhe Polonia dhe mbanin pushkë të prodhuara në Belgjikë dhe Republikën Çeke. /Telegrafi/