U mbajt për më shumë se gjashtë vjet, lirohet pengu afrikano-jugor – militantët e lidhur me Al-Qaedan fillimisht kërkuan para, pastaj e lëshuan pa asnjë kusht

Pengu afrikano-jugor, Gerco van Deventer, është liruar nga militantët e lidhur me Al-Qadea-n, pas një periudhe prej më shumë se gjashtë vitesh robëri.

Ai u kap nga një grup i paidentifikuar në Libi në vitin 2017, dhe u lirua në Algjeri, përcjell Telegrafi.

Fillimisht për lirimin e tij grupi kërkonte 3 milionë dollarë, por pasi familja nuk e përballonte dot shumën e madhe, ai u lirua pa kushte.

Ndryshe, pjesë të mëdha të Libisë llogariten si “të pakontrolluara nga ligji” që kur forcat e mbështetura nga NATO vranë sundimtarin afatgjatë Muammar Gaddafi në vitin 2011.

Dhe Al-Qaeda dhe grupe tjera ekstremiste kanë përdorur rrëmbimet si një mënyrë për të fituar para.

Për të luftuar kundër këtyre grupimeve, Franca kishte ndërhyrë me trupa në Mali në vitin 2013.

Ajo i tërhoqi trupat vitin e kaluar pas një grusht shteti në Afrikën Perëndimore dhe mospopullaritetit për operacionin e saj ushtarak.

Tani grupi famëkeq mercenar rus Wagner, është punësuar nga junta ushtarake e Malit për të luftuar militantët. /Telegrafi/