U dhuruan 29 banesa sociale në Veles

Në Veles sot janë vënë në përdorim 29 banesa nga 39 deri në 45 metra katrorë të destinuara për familjet e rrezikuara sociale në objektin social të sapondërtuar me sipërfaqe të përgjithshme prej 1843 metra katrorë në pesë kate dhe katin përdhes me hapësira për bodrum, të ndërtuara në pjesën e re të qytetit përballë ish industrisë “Kiro Quçuk” pas hekurudhës Veles- Manastir.

Në ceremoni morën pjesë qiramarrësit që do të vendosen në objekt, kryeministri Hristijan Mickoski, zëvendëskryeministri dhe ministri i Transportit dhe Lidhjeve, Aleksandar Nikolloski dhe përfaqësues të tjerë nga Qeveria, deputetë, kryetari i komunës Marko Kolev, Nada Trajkova drejtore e Qendrës për punë sociale në Veles dhe mysafirë të tjerë.

Zëvendëskryeministri dhe ministri i Transportit dhe Lidhjeve, Aleksandar Nikolloski tha se në tetor të vitit të kaluar e ka vizituar objektin social kur ende ishte në ndërtim dhe gëzohet që familjet do të jetojnë në kushte më të mira, duke ndërtuar një të ardhme më të mirë në një shtëpi të ngrohtë. Ai më pas informoi se objekti kap vlerën e 54 milionë denarëve.

“Do të vazhdojmë të punojmë në objekte të ngjashme edhe në pjesë të tjera të vendit në periudhën e ardhshme për të ndihmuar sa më shumë familje”, theksoi Nikolloski.

Kryeministri Hristijan Mickoski tha se nuk ka si të mos jetë njeriu i kënaqur, kur mund të bëjë dikë tjetër të jetë i lumtur, ashtu siç pata mundësinë të shoh dy përfitues të këtyre banesave.

“Mendoj se sa më shumë ndërtesa të këtilla dhe sa më shumë fytyra të lumtura, aq më i madh është edhe misioni ynë dhe aq më e madhe është kënaqësia jonë. Ja, drejtori tha se nuk do të ndalen këtu, përmendi Manastirin, aksionin që do të realizojnë atje me qëllim të uljes së çmimit për metër katror të hapësirës banesore. Dhe vlerësoj se kështu duhet të vazhdohet edhe në periudhën që vijon. Ne si Qeveri vazhdojmë të punojmë, të realizojmë atë që u kemi premtuar qytetarëve, kështu që edhe njëherë bashkohem me dëshirat për një shtëpi të rehatshme, për shumë lumturi dhe gëzim në këto shtëpi për përfituesit e ardhshëm dhe të kemi sa më shumë objekte të tilla dhe sa më shumë njerëz të lumtur, këtu te ne në Maqedoni”, ka thënë Mickoski.