Nurboja në konferencën e FMN-së prezanton pikëpamjet e BQK-së për ekonominë e Kosovës

Ushtruesi i detyrës së guvernatorit të Bankës Qendrore të Kosovës, Bashkim Nurboja ka marr pjesë në konferencën e organizuar nga Fondi Monetar Ndërkombëtar (FMN) së bashku me Bankën Kombëtare të Kroacisë “Lundrimi për në të ardhmen – politikëbërja në ujërat e rrëmujshme; nxitja e qëndrueshmërisë në Evropën Qendrore dhe Juglindore”.

Përveç guvernatorëve dhe ministrave të financave të 17 shteteve të ndryshme, në takim ishte dhe drejtoresha ekzekutive e FMN-së, Kristalina Georgieva.

Në diskutime, Georgieva me guvernatorët dhe ministrat e financave të shteteve përkatëse, u diskutua lidhur me sfidat dhe mundësitë nga pasojat e fragmentimit gjeo-ekonomik dhe siguria energjetike si dhe cili është roli i politikëbërjes në adresimin e këtyre sfidave.

Gjithashtu, në takim u diskutua rreth përkrahjes së FMN-së për të adresuar sfidat më urgjente ekonomike të shteteve, çfarë mund të bëjë më shumë FMN-ja për të ndihmuar dhe mbështetur shtetet, si dhe se si mund të shërbejnë më mirë shërbimet dhe komunikimi me FMN-në.

Gjatë konferencës, Nurboja shprehu pikëpamjet e BQK-së lidhur me fragmentimin gjeo-ekonomik në botë dhe sfidat e mundshme të ekonomisë së Kosovës, si rezultat i zhvillimeve të tilla në ekonominë botërore. /Telegrafi/